बैंकर तथा समाजसेवी पौड्याल बने नबिल बैंकको अध्यक्ष

काठमाडौं ।
नबिल बैंकको अध्यक्षमा बैंकर तथा समाजसेवी उपेन्द्र पौड्याल नियुक्त भएका छन् । मंगलबार बसेको बैंकको सञ्चालक समितिको बैठकले उनलाई अध्यक्षमा नियुक्त गरेको हो । नबिल बैंक लिमिटेडमा सर्वसाधारण लगानीकर्ताको तर्फबाट सञ्चालकको जिम्मेवारीमा रहेका बैंकका अध्यक्ष शम्भुप्रसाद पौड्याल र सञ्चालक दयाराम गोपाल अग्रवालको चार वर्षे कार्यकाल असोज १७ गते सकिएको छ ।

बैंकका अनुसार अध्यक्ष शम्भुप्रसाद पौड्यालको पदावधि सकिएपछि नयाँ अध्यक्ष नियुक्त गरिएको हो । २०७४ मंसिर १५ गतेदेखि उनी सञ्चालकको रूपमा नबिल बैंकमा प्रवेश गरेका पौड्याललाई सञ्चालक समितिले करिब तीन वर्षपछि अध्यक्ष बनाएको हो । उनी पछिल्लो समय एसिया प्यासिफिकको ग्लोबल अलाइन्स फर बैंकिङ अन भ्यालुको नेपालस्थित क्षेत्रीय प्रतिनिधि समेत हुन् ।

विश्वव्यापी रूपमा फैलिएको यो संस्थाले दिगो बैंकिङ विकास, सुशासन र समुदायको जीवनस्तर रूपान्तरण गर्ने खालका काम गर्दे आएको छ । नेशनल बैंकिङ इन्स्टिच्युटको निर्देशक रहेको उनी सफल बैंकरसँगै समाजसेवीका रूपमा समेत परिचित रहेका छन । तीन दशकभन्दा बढी बैंकिङ क्षेत्रको अनुभव हासिल गरेका उनी यसअघि एनएमबी बैंक लिमिटेडको संस्थापक प्रमुख कार्यकारी अधिकृतको जिम्मेवारीमा रहेका थिए ।