एनआईसी एसिया बैंकको कार्डबाट भुक्तानी गर्दा २५ प्रतिशत रकम फिर्ता पाइने

काठमाडौं ।
एनआईसी एसिया बैंकको कार्डबाट भुक्तानी गर्ने ग्राहकहरूले २५ प्रतिशतसम्मको रकम फिर्ता पाउने भएका छन् । बैंकले सार्वजनिक गरेको आकर्षक नगद फिर्ताको योजनाअन्तर्गत ग्राहकले उक्त छुट पाउने भएका हुन् । बैंकका अनुसार ग्राहकहरूले आकर्षक योजनाअन्तर्गत सस्तो डिल, ग्यापु मार्केट प्लेस, ठूलो पसल, इन्फिस्टोर, ओकेदम र कलमार्टजस्ता ई–कमर्शबाट बैंकका ग्राहकले डेबिट तथा क्रेडिट कार्ड प्रयोग गरी अनलाइन भुक्तानी गर्दा अधिकतम २५ प्रतिशतसम्म नगद फिर्ता प्राप्त गर्न सक्नेछन् ।

बैंकले डिजिटल कारोबारमा ग्राहकलाई प्रोत्साहन गर्नका निमित्त उक्त ई–कमर्श कम्पनीहरूबाट जुनसुकै सामग्रीहरू खरिद गर्दा आकर्षक नगद फिर्ताको व्यवस्था गरेको हो । बैंकले सस्तो डिल र ग्यापु मार्केट प्लेसमा २० प्रतिशत वा दुुई हजार रुपैयाँसम्म, कलमार्टमा २५ प्रतिशत वा एक हजार पाँच सय रुपैयाँसम्म तथा ठूलो पसल, इन्फिस्टोर र ओकेदम मा १५ प्रतिशत वा एक हजार रुपैयाँसम्म नगद फिर्ता हुने व्यवस्था गरेको छ ।

बैंकमा आबद्ध ग्राहकले असोज २७ गतेदेखि कात्तिक एक गतेसम्म ई–कमर्शहरूबाट किनमेल गर्दा डिजिटल भुक्तानी गरी उक्त नगद फिर्ता प्राप्त गर्न सक्नेछन् । बैंकले उक्त ईकमर्शहरूसँग समझदारी गरी आकर्षक नगद फिर्ताको व्यवस्था गरेको हुँदा ग्राहकले सो अवसरको फाइदा लिने विश्वास बैैकले गरेको छ । साथै, यस बैंकका डेबिट तथा क्रेडिट कार्ड प्रयोगकर्ताहरूले बैंकको वेबसाइटमा रहेको आईसर्भमार्फत समयमै आफ्नो कार्डमा ई–कमर्श सुचारु गरी यस योजनाको अधिकतम फाइदा उठाउन पनि बैंकले आग्रह गरेको छ ।