एनआईबीएल एस क्यापिटलको आठौं वार्षिक साधारणसभा

काठमाडौँ  ।
एनआईबीएल एस क्यापिटल लिमिटेडले आठौं वार्षिक साधारणसभा सम्पन्न गरेको छ । कम्पनीले बुुधबार क्यापिटलको सभाहल लाजिम्पाट, काठमाडौँमा वार्षिक साधारणसभा सम्पन्न गरेको हो । सभाले आर्थिक बर्ष २०७६/७७ को सञ्चालक समितिको प्रतिवेदन तथा सोही मितिमा समाप्त भएको वासलात, नाफा नोक्सान हिसाव र नगद प्रवाह विवरण पारित गरी सञ्चालक समितिको सिफारिसबमोजिम आर्थिक वर्ष २०७६/७७ को नाफाबाट चुक्ता पुँजीको २२ दशमलव २२ प्रतिशत नगद लाभांश समेत दिने भएको छ ।

एक मात्र सेयरधनी नेपाल इन्भेष्टमेण्ट बैंक लिमिटेडको प्रतिनिधि बरुण श्रेष्ठले बैंकको तर्फबाट प्रतिनिधित्व गरेको उक्त साधारणसभाको सभापतित्व सञ्चालक समितिका अध्यक्ष सचिन टिवडेवालले गरेका थिए । उक्त सभामा सञ्चालक सदस्यहरू दिपककुमार श्रेष्ठ, बन्दना थापा र रविन्द्र भट्टराईको समेत उपस्थिति रहेको थियो । त्यसैगरी नियमन निकायका प्रतिनिधिहरू, लेखापरीक्षक तथा कम्पनीका प्रमुख कार्यकारी अधिकृत, कम्पनी सचिवलगायत अन्य पदाधिकारीहरूको समेत समुपस्थितिमा सम्पन्न भएको कम्पनीले जानकारी दिएको छ ।