सनराइज बैंकका तीनवटा नयाँ शाखा

काठमाडौं ।
सनराइज बैंकले एकैदिन थप तीनवटा शाखाहरू सञ्चालनमा ल्याएको छ । बैंकका अनुसार यही कात्तिक १७ गते सोमबारबाट वाग्मती प्रदेशको सूर्यविनायक, गण्डकी प्रदेशको अमरसिंह र लुम्बिनी प्रदेशको योगीकुटीमा गरी तीनवटा शाखा सञ्चालनमा ल्याइएको हो ।

नयाँ शाखा विस्तारसँगै बैंकको कुुल शाखा संख्या एक सय ३९, ५१ वटा शाखारहित बैंकिङ सेवा, ११ वटा एक्सटेन्सन काउन्टर र एक सय ६१ वटा एटीएममार्फत आफ्ना सात लाखभन्दा बढी ग्राहकहरूलाई वित्तीय सेवा उपलब्ध गराउँदै आएको छ । बैंकले आफ्ना सेवाहरू विस्तार गर्ने क्रममा नेपालका अन्य स्थानहरूमा पनि थप शाखाहरू सञ्चालन गर्ने योजना रहेको जानकारी दिएको छ ।

बैंकले गत आर्थिक वर्षको चौथो त्रैमासिक अवधिमा एक अर्ब ३९ करोड २८ लाख ७७ हजार रुपैयाँ खुद मुनाफा आर्जन गरेको छ । अघिल्लो आवको सोही अवधिमा बैंकको यस्तो नाफा एक अर्ब ७० करोड ६१ लाख रुपैयाँ रहेको थियो । हाल चुक्ता पुँजी आठ अर्ब ९६ करोड ७८ लाख ११ हजार रुपैयाँ रहेको बैंकले गत आवको चौथो त्रैमासिक अवधिमा ९० अर्ब २३ करोड ३२ लाख ७१ हजार रुपैयाँ निक्षेप संकलन गरी ८१ अर्ब चार करोड तीन लाख ७३ हजार रुपैयाँ कर्जा प्रवाह गरेको छ ।

सो अवधिमा तीन अर्ब ८७ करोड ८० लाख ९८ हजार रुपैयाँ खुद ब्याज आम्दानी गरेको बैंकमा एक दशमलव ८६ प्रतिशत कर्जा निष्क्रिय रहेको छ । यस अवधिमा चार दशमलव ३७ प्रतिशत स्प्रेड दर रहेको बैंकको वितरणयोग्य नाफा ५२ करोड ९१ लाख २१ हजार रुपैयाँ रहेको छ ।

अघिल्लो आवको सोही अवधिमा बैंकले ७४ अर्ब ४३ करोड २१ लाख ५० हजार रुपैयाँ निक्षेप संकलन गरी ६८ अर्ब ८६ करोड ५८ लाख १० हजार रुपैयाँ कर्जा प्रवाह गरेको थियो । उक्त अवधिमा तीन अर्ब ५८ करोड ४९ लाख रुपैयाँ खुद ब्याज आम्दानी गरेको बैंकमा एक दशमलव शून्य प्रतिशत कर्जा निष्क्रिय रहेको थियो भने स्प्रेड दर चार दशमलव ४४ प्रतिशत रहेको थियो ।