राष्ट्रिय वाणिज्य बैंक र सुनकोशी गाउँपालिकाबीच सहुलियत कर्जाको लागि सम्झौता

काठमाडौँँ ।
राष्ट्रिय वाणिज्य बैंक लिमिटेड र सुनकोशी गाउँपालिका (सिन्धुलीे जिल्ला)बीच सहुलियतपूर्ण कर्जामा सहकार्य गर्ने सम्बन्धमा सम्झौता भएको छ । सम्झौतामा बैंकका प्रमुख कार्यकारी अधिकृत किरणकुमार श्रेष्ठ र सुनकोशी गाउँपालिकाका अध्यक्ष दिपा बोहोरा(दाहाल)ले हस्ताक्षर गरेका हुन् ।

सम्झौतापछि गाउँपालिकाले आफ्नो क्षेत्रभित्र उद्यम तथा व्यवसाय गर्न चाहने व्यक्तिलाई परामर्श र उद्यमशीलतासम्बन्धी आवश्यक तालिमको व्यवस्थापन गर्नेगरी तालिमप्राप्त व्यक्तिलाई कर्जाको लागि बैंकमा सिफारिस गर्नेछ । गाउँपालिकाले सिफारिस गरेका उद्यमीहरूलाई बैंकले नियमानुसार सहुलियपूर्ण कर्जाअन्तर्गत कर्जा लगानी गर्नेछ । कार्यक्रममा वाग्मती प्रदेशसभाका सांसद राजन दाहालले गाउँपालिकाले बजार तथा सडकको विस्तार गरिसकेको हुनाले कृषकलाई उत्पादन, बजारीकरण कार्यको लागि उत्प्रेरित गर्न यस्तो कर्जाले सघाउ पु-याउने बताए ।

बैंकका प्रमुख कार्यकारी अधिकृत किरणकुमार श्रेष्ठले यस्तो सहमतिले स्थानीयस्तरमा उद्यमशीलताको विकास भई कर्जा लगानी र असुलीमासघाउ पुग्ने बताए । गाउँपालिकाका अध्यक्ष दिपा बोहोरा (दाहाल)ले यस्तो सहुलियतपूर्ण कर्जा युग परिवर्तन गर्नको लागि अवसर हुने बताए । बैंकका नायब प्रमुख कार्यकारी अधिकृत कविराज अधिकारीले स्वागत मन्तव्य तथा विभागीय प्रमुख राज्य लक्ष्मी खड्गीले कार्यक्रम सञ्चालन गरेका थिए । उक्त कार्यक्रममा बैंकका उप कार्यकारी अधिकृत देवेशप्रसाद लोहनी, सहायक प्रबन्धक राजन घिमिरे, प्रकाश राई, गाउँपालिकाका उपाध्यक्ष दिर्वसिं मुक्तान, गाउँपालिकाका पदाधिकारीहरू, कर्मचारीहरूलगायतको उपस्थिति रहेको थियो ।