मुक्तिनाथ विकास बैंकद्वारा कर्जाको लागि अनलाइन आवेदन सुरु

काठमाडौं ।
मुक्तिनाथ विकास बैंकले कर्जाको लागि अनलाईन आवेदन सुरु गरेको छ । बैंकले ग्राहकहरूको समयको महत्वलाई ध्यानमा राखी र कोरोना (कोभिड १९)को महामारीको विषम परिस्थितीमा डिजिटल प्रणालीको प्रोत्साहन गर्ने गरी अनलाइन कर्जा आवेदन सेवा सञ्चालनमा ल्याएको हो ।

बैंकलाई थप प्रविधिमैत्री बनाउने क्रममा बैंकले आफ्नो वेबसाइटबाट सिधै विभिन्न कर्जाका लागि आवेदन दिनसक्ने साथै कर्जा स्वीकृतिका लागी आवश्यकपर्ने कागजात समेत अनलाइनमार्फत नै ग्राहकहरूले प्रस्तुत गर्नसक्ने सुविधा उपलब्ध गराएको हो । यस प्रणालीमार्फत ग्राहकले आफूलाई सहज पर्ने कुनै पनि शाखा अनलाइन नै छनोट गरी कर्जा आवेदन दिन सकिने साथै, सम्पूर्ण कागजात प्रस्तुत गरिएको सात कार्य दिनभित्र नै कर्जा स्वीकृति गरिनेछ ।

बैंकले नयाँ प्रविधिलाई आत्मसात गर्नुका साथै बैंकमा कार्यरत कर्मचारी र ग्राहकवर्गको स्वास्थ्य र सुरक्षालाई उच्च प्राथमिकतामा राखी वित्तीय सेवा प्रदान गर्ने उद्देश्यले अनलाइन कर्जा आवेदन सेवा सञ्चालनमा ल्याइएको हो । कोरोनाको संक्रमणबाट सुरक्षित भई डिजिटल बैंकिङ कारोबार र प्रणालीको प्रोत्साहन गर्न बैंकको ग्राहकले भिसा नेटवर्कअन्तर्गत जुन सुकै बैंकको एटीएमबाट विना कुनै शुल्क रकम झिक्न सकिने व्यवस्था गरिएको जानकारी समेत बैंकले दिएको छ ।