माछापुच्छ्रे बैंक र एसोसिएसन अफ प्रि स्कुल एजुकेटर्स नेपालबीच सम्झौता

काठमाडौं ।
माछापुच्छ्रे बैंक र एसोसिएसन अफ प्रि स्कुल एजुकेटर्स नेपालसँग आबद्ध सदस्य वा सदस्यहरूद्वारा सञ्चालित उद्यमीहरूलाई सहुलियत कर्जा उपलब्ध गराउनेसम्बन्धी सम्झौता भएको छ । सम्झौतामा एसोसिएसन अफ प्रि स्कुल एजुकेटर्स नेपालको तर्फबाट अध्यक्ष बद्रीप्रसाद दाहाल तथा माछापुच्छ्रे बैंकको तर्फबाट संस्थागत तथा पूर्वाधार कर्जा लगानी प्रमुख, सुभाष जमरकट्टेलले हस्ताक्षर गरेका हुुन् ।

सम्झौतापश्चात् एशोसिएसन अफ प्रि स्कुल एजुकेटर्स नेपालसँग आबद्ध सदस्य वा सदस्यहरूद्वारा सञ्चालित उद्यमीहरूलाई माछापुच्छ्रे बैंकले न्यूनतम एक लाख रुपैयाँदेखि अधिकतम १५ लाख रुपैयाँसम्मको सहुलियत कर्जा उपलब्ध गराउनेछ । साना व्यवसायीहरूको मनोबल वृद्धि गरी स्वदेशमै आत्मनिर्भरता बढाउने तथा कोभिड १९ ले सिर्जित विषम परिस्थितिका कारण विगत लामो समयदेखि बन्द रहेका स्कुल तथा अन्य व्यवसायहरू विस्तारै खुल्दै जान थालेको अवस्थामा व्यवसायहरूलाई पुनर्जीवन प्रदान गर्ने उद्देश्यले माछापुच्छ्रे बैंकले उक्त सम्झौता गरेको जनाएको छ ।

स्थापनाकालदेखि नै नयाँ–नयाँ प्रविधिमा आधारित सेवा सुविधा ग्राहकमाझ ल्याउन कटिबद्ध रहेको बैंकले पूर्वदेखि पश्चिम साथै हिमालदेखि पहाड र तराईसम्म आफ्ना एक सय ६० वटा शाखाहरू, एक सय ३३ शाखारहित बैकिङ सेवा र पाँचवटा एक्सटेन्स काउन्टरसमेत गरी जम्मा दुई सय ९८ स्थानमा रहेका सेवा सञ्जाल तथा एक सय ९८ वटा एटीएमहरू तथा एक हजारभन्दा बढी पीओएसमार्फत ग्राहकवहरूलाई अत्याधुनिक प्रविधिसहित सम्पूर्ण बैंकिङ सुविधा प्रदान गर्दै आएको छ ।