नेपाल फाइनान्सले ललितपुर फाइनान्सलाई प्राप्ति गर्ने, आगामी नयाँ वर्षमा एकीकृत कारोबार

काठमाडौं ।
नेपाल फाइनान्सले ललितपुर फाइनान्सलाई प्राप्ति गर्ने भएको छ । संस्थाको यही पुुस २२ गते बसेको सञ्चालक समितिको तीन सय ३२औं बैठकले ललितपुर फाइनान्सलाई प्राप्ति गर्ने निर्णय गरेको हो । सोलगत्तै अर्थात् पुस २३ गते दुवै फाइनान्सका अध्यक्ष तथा सञ्चालकहरूले मर्जरसम्बन्धी प्रक्रिया अगाडि बढाउने विषयमा हस्ताक्षर गरेका छन् । सम्झौतामा नेपालमा फाइनान्सका तर्फबाट अध्यक्ष डा. हिरेन्द्रमान प्रधान र ललितपुर फाइनान्सका तर्फबाट सञ्चालक समितिका अध्यक्ष दिपक महर्जनले हस्ताक्षर गरेका हुन् ।

हाल नेपाल फाइनान्सको चुक्ता पुँजी ३१ करोड रुपैयाँ रहेको छ भने ललितपुर फाइनान्सको चुक्ता पुँजी २४ करोड रुपैयाँ रहेको छ । नेपाल फाइनान्सको हाल दुईवटा शाखा रहेका छन् भने थप छवटा शाखा तथा दुई वटा एक्सटेन्सन काउन्टर खोल्ने प्रक्रियामा रहेको छ । जसमध्ये छ वटा शाखाहरू उपत्यका बाहिर र दुई वटा एक्सटेन्सन काउन्टर उपत्यका भित्र खोल्छौँ, नेपाल फाइनान्सका प्रमुख कार्यकारी अधिकृत उद्धवराज थपलियाले भने । ललितपुर फाइनान्सको भने हाल तीनवटा शाखा रहेको छ । प्राप्तिपछि भने फाइनान्सको कुल शाखा संख्या १३ पुग्ने छ ।

ललितपुर फाइनान्स सिंगो ललितपुरवासीहरूको आस्थासँग जोडिएको फाइनान्स हो, यसमा धेरै सकारात्मक पक्षहरू रहेका छन् । विभिन्न कारणहरूले गर्दा वित्तीय अवस्था केही कमजोर रहेको भए पनि हामी त्यसलाई रिकभर गरेर सबल बनाउन सक्षम छौँ, प्रमुख कार्यकारी थपलियाले भने । प्रमुख कार्यकारी थपलियाका अनुसार चैतसम्म प्राप्तिको सबै प्रक्रिया पूरा गरेर नयाँ वर्ष अर्थात् वैैशाख एक गतेदेखि एकीकृतरूपमा कारोबार सुभारम्भ गर्ने लक्ष रहेको पनि प्रमुख कार्यकारी थपललियाले जानकारी दिएका छन् ।