झण्डै पाँच करोड पुग्यो निक्षेप खाताको संख्या

काठमाडौं,बैंक तथा फाइनान्स कम्पनीहरुमा सञ्चालनमा रहेको कुल निक्षेप खाताको संख्या झण्डै पाँच करोड पुगेको छ । नेपाल राष्ट्र बैंकका अनुसार हाल २२ वटा वाणिज्य बैंक, क्षेत्रीय तथा राष्ट्रियस्तरका समेत गरी १७ वटा विकास बैंक, १७ वटा फाइनान्स कम्पनी र ६४ वटा लघुवित्त वित्तीय संस्था सञ्चालनमा रहेका छन् । जसमध्ये लघुवित्त वित्तीय संस्थाबाहेकका ५६ वटा संस्थाहरुमा मात्र रहेको कुल निक्षेप खाताको संख्या चार करोड ८३ लाख २४ हजार नौ सय ३९ पुगेको हो ।

देशभर बैंक तथा फाइनान्स कम्पनीहरुको छ हजार चार सय ३७ वटा शाखाहरु सञ्चालनमा रहेका छन् ।उक्त शाखामध्ये वाणिज्य बैंकहरुको मात्र पाँच हजार २९, विकास बैंकहरुको एक हजार एक सय २८ र फाइनान्स कम्पनीहरुको दुई सय ८० वटा शाखाहरु सञ्चालनमा रहेका छन् । यी सबै शाखामा सञ्चालनमा रहेको कुल निक्षेप खाता संख्या चालू आवको पुस मसान्तसम्ममा चार करोड ८३ लाख पुगेको राष्ट्र बैंकको भनाइ छ । यस अवधिमा बैंकिङ क्षेत्रमा कायम रहेको कुल कर्जा खाताको संख्या भने १८ लाख ३३ हजार एक सय ६५ वटा मात्र रहेको छ ।

राष्ट्र बैंकका अनुसार बैंक तथा फाइनान्स कम्पनीहरुमा कायम रहेको कुल निक्षेप खातामध्येमा वाणिज्य बैंकहरुमा मात्र रहेको निक्षेप खाताको संख्या चार करोड १६ लाख २६ हजार एक सय ५८ वटा रहेको छ भने विकास बैंकहरुमा सञ्चालनमा रहेको कुल निक्षेप खाताको संख्या ५९ लाख ७७ हजार दुई सय ४५ वटा रहेको छ । यस अवधिमा फाइनान्स कम्पनीहरुमा भने सात लाख २१ हजार पाँच सय ३६ वटा बचत खाताहरु सञ्चालनमा रहेका छन् ।

राष्ट्र बैंकका अनुसार बैंकिङ क्षेत्रमा सञ्चालनमा रहेको कुल कर्जा खातामध्ये वाणिज्य बैंकहरुमा मात्र सञ्चालनमा रहेको कुल कर्जा खाताको संख्या १६ लाख तीन हजार सात सय ६६ वटा रहेको छ । यस अवधिमा विकास बैंकहरुमा मात्र सञ्चालनमा रहेको कुल कर्जा खाताको संख्या दुई लाख ८७ हजार पाँच सय ८१ वटा रहेको छ भने फाइनान्स कम्पनीहरुमा सञ्चालनमा रहेको कुल कर्जा खाताको संख्या ४१ हजार आठ सय १८ वटा रहेको छ । यस अवधिमा बैंक तथा फाइनान्स कम्पनीहरुको सञ्चालनमा रहेको कुल एटीएम काउन्टरको संख्या भने चार हजार छ सय ४८ वटा रहेको छ । जसमध्ये वाणिज्य बैंकहरुको चार हजार दुई सय ७४ वटा, विकास बैंकहरुको तीन सय ३० वटा र फाइनान्स कम्पनीहरुको ४४ वटा एटीएम काउन्टरहरु सञ्चालनमा रहेको राष्ट्र बैंकको भनाइ छ ।

राष्ट्र बैंकका अनुसार चालू आवको पछिल्लो छ महिनामा बैंकिङ क्षेत्रको कुल निक्षेप तथा कर्जा रकम भने क्रमशः ५३ खर्ब ६० अर्ब ६४ करोड ५० लाख र ४८ खर्ब ४० अर्ब १९ करोड ६० लाख रुपैयाँ पुगेको छ । जसमध्ये वाणिज्य बैंकहरुको मात्र कुल निक्षेप तथा कर्जा रकम क्रमशः ४७ खर्ब १७ अर्ब ५० लाख तथा ४२ खर्ब ८४ अर्ब ७१ करोड ५० लाख रुपैयाँ पुगेको छ भने विकास बैंकहरुको कुल निक्षेप तथा कर्जा रकम क्रमशः पाँच खर्ब ३४ अर्ब ३७ करोड ८० लाख र चार खर्ब ६२ अर्ब ४४ करोड १० लाख रुपैयाँ पुगेको छ ।
यस अवधिमा फाइनान्स कम्पनीहरुको कुल निक्षेप तथा कर्जा रकम भने क्रमशः एक खर्ब नौ अर्ब २६ करोड २० लाख तथा ९३ अर्ब चार करोड १० लाख रुपैयाँ पुगेको राष्ट्र बैंकको भनाइ छ ।

आज पुनः १५ अर्ब १३ करोड रुपैयाँको टे«जरी बिल जारी गर्दै राष्ट्र बैंक
काठमाडौं, फागुन १४ । नेपाल राष्ट्र बैंकले फागुन १५ गते अर्थात् आज सोमबार पुनः १५ अर्ब १३ करोड रुपैयाँबराबरको टे«जरी बिल बिक्री गर्ने भएको छ । राष्ट्र बैंकका अनुसार आज अपराह्न ३ बजेसम्म उक्त परिमाणमा टे«जरी बिल बिक्री गर्न लागिएको हो । यसअघि यही फागुन ८ गते पनि राष्ट्र बैंकले सात अर्ब २३ करोड ३२ लाख रुपैयाँबराबरको टे«जरी बिल बिक्री गरेको थियो ।

राष्ट्र बैंकका अनुसार जारी मिति फागुन १६ गते मंगलबार तोकिएको टे«जरी बिल खरिदको लागि वाणिज्य बैंक, विकास बैंक र फाइनान्स कम्पनीहरुले भाग लिन पाउनेछन् । बिक्री गरिने उक्त टे«जरी बिलहरु क्रमशः २८ दिने अवधिको पाँच अर्ब, ९१ दिने अवधिको तीन अर्ब १३ करोड र तीन सय ६४ दिने अवधिको सात अर्ब रुपैयाँबराबरको रहेको छ ।

जसमध्ये २८ दिनेको २०७९ चैत्र १४ गते, ९१ दिनेको २०८० जेठ १६ गते र तीन सय ६४ दिने अवधिको २०८० चैत्र १५ गते परिपक्व हुने अवधि तोकिएको छ । राष्ट्र बैंकका अनुसार आज बिक्री हुुने यी टे«जरीमा सात अर्ब रुपैयाँबराबरको नयाँ रहेको छ भने बाँकी पुरानो नवीकरणअन्तर्गतको रहेको छ ।यसअघि अर्थात् गतसाता पनि राष्ट्र बैंकले २८ दिने अवधिको पाँच अर्ब र ९१ दिने अवधिको दुई अर्ब २३ करोड ३२ लाख रुपैयाँबराबरको टे«जरी बिल जारी गरेको थियो ।