छाउपडी प्रथा उन्मूलनमा महालक्ष्मी विकास बैंकको सहयोग

काठमाडौं । महालक्ष्मी विकास बैंकले संस्थागत सामाजिक उत्तरदायित्व अन्तर्गत सुदूरपश्चिम प्रदेशमा छाउपडी प्रथा उन्मूलनका लागि आर्थिक सहयोग गरेको छ ।

सुदूरपश्चिमका आछाम, बाजुरा, बझाङ, डोटी, दार्चुला, बैतडी, डडेलधुरा जिल्लामा छाउपडी प्रथा अझै कायम छ । एक्सन वक्र्स नेपालले सञ्चालन गरिरहेको छाउपडी र महिनावारी स्वास्थ्य स्वच्छता व्यवस्थापन परियोजनालाई सफल बनाउन आर्थिक सहयोग गरेको बैंकले जनाएको छ ।

छाउपडी प्रथाप्रति रहेको पुरातन विश्वास, मान्यता र प्रचलनविरुद्ध जनचेतना जगाउने र त्यस प्रथाबाट प्रत्यक्षरूपमा प्रभावित बालिक तथा महिलाहरूलाई स्वास्थ्य सेवा तथा पोषणका सम्बन्धमा जानकारी प्रदान गर्ने उद्देश्यले सञ्चालित यस योजना बैतडी जिल्लाको दिलासैनी गाउँपालिकामा करिब चार महिना सञ्चालन गरिनेछ । योजनाअन्तर्गत गाउँपालिकामा सामाजिक सचेतनाका कक्षाहरू, सडक नाटक, डेउडा नाच तथा स्थानीय स्रोतसाधनको प्रयोग गरी पुनः प्रयोग गर्न सकिने सेनीटरी प्याड बनाउने तालिम प्रदान गरिनेछ । बैंकले आगामी दिनमा पनि सामाजिक, आर्थिक रूपान्तरणका लागि निरन्तर सहयोग गर्दै जाने जनाएको छ ।