राष्ट्रिय वाणिज्य बैंकद्वारा नेपाल प्रहरीलाई सहयोग

काठमाडौं । राष्ट्रिय वाणिज्य बैंक लिमिटेडले संस्थागत सामाजिक उत्तरदायित्वअन्तर्गत नेपाल प्रहरीलाई ३० लाख रुपैयाँ आर्थिक सहयोग गरेको छ । बैंकका प्रमुख कार्यकारी अधिकृत किरणकुमार श्रेष्ठले प्रहरी महानिरीक्षक बसन्तबहादुर कुँवरलाई सो रकमबराबरको चेक बुधबार हस्तान्तरण गरेका हुन् ।

सो रकम नेपाल प्रहरीले सञ्चालन गर्ने शिक्षा, स्वास्थ्य, वित्तीय साक्षरता, खेलकुद, प्रकोप व्यवस्थापन, ट्राफिक सचेतना, प्रहरी परिवारलाई उद्यमशीलतासम्बन्धी कार्यका खर्च हुने बैंकले जनाएको छ ।

सहयोग हस्तान्तरण कार्यकममा प्रहरी नायब महानिरीक्षक पोषराज पोखरेल, बैंकका उपकार्यकारी अधिकृत पवन रेग्मी, विभागीय प्रमुख आनन्द सुवेदी, प्रबन्धक जितेन्द्रसिंह थापा, शाखा कार्यालय नक्सालका प्रबन्धक माधव खतिवडालगायत वरिष्ठ प्रहरी अधिकृतहरूको उपस्थिति रहेको थियो ।

बैंकले हाल ७७ जिल्लामा दुई सय ६५ शाखा कार्यालय, ५२ वटा एक्सटेन्सन काउन्टर, दुई सय ६९ एटीएम र ९९ वटा शाखारहित बैंकिङमार्फत वित्तीय सेवा दिँदै आएको छ । यस्तै क्यूआर कोड, पस सेवा, क्रेडिट कार्ड, डेबिट कार्ड, कनेक्ट आईपीएस, स्मार्ट क्यूआर टेलर, इन्टरनेट बैंकिङ, मोबाइल बैंकिङ, इन्टरनेटविना चल्ने यूएसएसडी मोबाइल बैंकिङलगायतका सेवा समेत सञ्चालन गरिरहेको छ ।