ज्योति विकासको वित्तीय साक्षरता कार्यक्रम

काठमाडौं । ज्योति विकास बैंकले ग्लोबल मनी विक–२०२३ अभियानअन्तर्गत विभिन्न स्थानमा वित्तीय साक्षरता कार्यक्रम सम्पन्न गरेको छ । बैंकले विभिन्बन शाखामार्फत देशका विभिन्न ठाउँमा वित्तीय साक्षरता र सचेतनाका कार्यक्रमहरू आयोजना गरेको जनाएको छ । बैंकले ‘प्लान योर मनी, प्लान्ट योर फ्युचर’ भन्ने विषयवस्तुमा केन्द्रित भई युवावर्गमा वित्तीय साक्षरतासम्बन्धी कार्यक्रम सञ्चालन गरेको हो ।

कार्यक्रम विभिन्न स्कुल तथा कलेज, विभिन्न संघसंस्थालगायत समुदायमा केन्द्रित थियो । आधुनिक बैंकिङ, बचत, ऋण, लगानी, विद्युतीय बैंकिङ सेवा र यसमा अपनाउनुपर्ने सावधानी, उद्यमशीलता विकासलगायतका विषयमा कार्यक्रम केन्द्रित रहेको बैंकले जनाएको छ ।

साथै, बैंकले सामाजिक सञ्जाल र वेबसाइटमार्फत पनि बचत प्रोत्साहन गर्न, अज्ञात स्रोतहरूबाट आएका कुनै पनि लिंकहरू नखोल्न, ओटीपी पासवर्ड, पिन, सीभीभीलगायतका विवरण कसैसँग पनि सेयर नगर्न र डिजिटल ठगीबाट सचेत रहन विभिन्न सूचनाहरू प्रवाह गरेको थियो । बैंकले संस्थागत सामाजिक उत्तरदायित्वअन्तर्गत यस्तो कार्यक्रम विगतदेखि नै निरन्तर सञ्चालन गर्दै आइरहेको छ । बैंकले हाल १२१ वटा शाखा कार्यालय, तीनवटा विस्तारित काउन्टर तथा ७४ वटा एटीएममार्फत वित्तीय सेवा उपलव्ध गराउँदै आएको छ ।