निक्षेपको तुलनामा ऋण प्रवाह दोब्बर बढी

काठमाडौं । नुवाकोटमा निक्षेपको तुलनामा कर्जा लगानी झण्डै दोब्बरले बढी भएको पाइएको छ । जिल्लामा रहेका बैंक तथा वित्तीय संस्थाका शाखा प्रबन्धकहरूका अनुसार नुवाकोटमा कुल निक्षेप पाँच अर्ब रुपैयाँ रहेको छ । यस्तै बैंकहरूले प्रवाह गरेको ऋणको आकार १२ अर्ब रुपैयाँ रहेको छ । जिल्लाको वित्तीय क्षेत्रको वर्तमान अवस्थाबारे शुक्रबार नेपाल राष्ट्र बैंकका डेपुटी गभर्नर बमबहादुर मिश्रसँग छलफल गर्दै शाखा प्रबन्धकहरूले सो तथ्याङ्क प्रस्तुत गरेका हुन् ।

जिल्लामा १९ वाणिज्य बैंक, पाँच विकास बैंक र एक फाइनान्स गरी कुल २५ बैंक तथा वित्तीय संस्थाका शाखा सञ्चालनमा छन् । कार्यक्रममा डेपुटी गभर्नर मिश्रले पछिल्लो समय ऋण नतिर्न फैलाइएका अफवाहप्रति सजग रहँदै निक्षेपकर्तालाई भरोसा दिलाउन आग्रह गरेका छन् । छलफलमा सहभागी एक प्रबन्धकका अनुसार डेपुटी गभर्नरले कर्जा असुली, निक्षेपको अवस्था र निष्क्रिय कर्जामाथि चासो दिएका थिए । डेपुटी गभर्नर मिश्रले अहिलेसम्म बैंक तथा वित्तीय संस्थाहरूको स्वास्थ्यमा कुनै असर परिनसकेको बताए । तर केही समस्या भए लिखित सुझाव नि आग्रह गरे । ‘जिल्लास्तरमा रहेको समस्या समाधान गर्न लिखित सुझाव पठाउनु सुधारको लागि पहल हुन्छ, तपाईँहरूलाई तपाईँको केन्द्रले र हामीले सुपरीवेक्षण गरिरहेका छौँ, बैंकहरूको स्वास्थ्य राम्रोे छ तर बाहिर विभिन्न हल्ला फैलिरहेका छन् ध्यान दिनुहोला’, उनले भने ।

अहिले बैंकहरूको स्वास्थ्य ठीक भए पनि खराब कर्जाको अवस्था सन्तोषजनक नरहेको उनले बताए । तर वाणिज्य बैंकहरूले दक्षिण एसियामा नेपालका बैंकहरूको कर्जाको स्थिति सन्तोषजनक रहेको दाबी गरिरहेका छन् ।

राष्ट्र बैंकका अनुसार माघ मसान्तसम्म वाणिज्य बैंकहरूको खराब कर्जाको स्थिति २ दशमलव ४९ प्रतिशत, विकास बैंकको २ दशमलव ८२ प्रतिशत र वित्त कम्पनीको ७ दशमलव ८२ प्रतिशत रहेको छ । जब कि एक वर्षअघि २०७८ माघमा वाणिज्य बैंकहरूको १ दशमलव १८ प्रतिशत, विकास बैंकको १ दशमलव ४२ प्रतिशत र वित्त कम्पनीको ७ दशमलव ५ प्रतिशत खराब कर्जा रहेको थियो ।