महालक्ष्मी विकास बैंकले सस्तो ब्याजदरमा कर्जा दिने

काठमाडौं  । महालक्ष्मी विकास बैंकले सस्तो ब्याजदरमा आवास तथा व्यावसायिक कर्जामा दिने भएको छ । बैंकले नयाँ वर्षको अवसर पारेर घर खरिद गर्ने वा निर्माण गर्नेहरूलाई आवास कर्जा र उद्यम गर्न इच्छुकलाई सुलभ दरमा व्यावसायिक कर्जा योजना सार्वजनिक गरेको हो ।

 बैंकले दुवै कर्जा योजनामा ऋणिका लागि १२ दशमलव नौ–नौ प्रतिशत ब्याजदरमा कर्जा प्रवाह गरिने जनाएको छ । यस्तै सो कर्जाको सेवाशुल्कमा समेत विशेष छुट दिइने जनाएको छ । बैंकले महिला सशक्तिकरणका लागि ऋणी महिला भएमा सेवाशुल्कमा शून्य दशमलव दुई–पाँच प्रतिशतसम्म छुट प्रदान गर्ने र सो सुविधा सीमित समयका लागि रहने जनाएको छ । आवास कर्जा योजनाअन्तर्गत ऋणीका लागि निर्माण लागतको शतप्रतिशत कर्जा प्रवाह गर्नुका साथै कर्जाको अवधि अधिकतम ३० वर्ष, घर निर्माणमा अग्रीम कर्जा प्रवाह तथा सेवा शुल्कमा छुटजस्ता आकर्षक सुविधाहरू प्रदान गर्ने बैंकले जनाएको छ ।

व्यावसायिक कर्जा योजनाअन्तर्गत ऋणिका लागि धितो मूल्यांकनमा उच्चतम कर्जा प्रवाह गर्नुका साथै व्यवसाय सुरु गर्न अग्रीम कर्जा प्रवाह गर्ने तथा सेवाशुल्कमा छुटजस्ता सुविधाहरू बंैकले प्रदान गर्ने छ । हाल विद्यमान तरलता अभाव तथा बढ्दो ब्याजदरका बीच पनि बैंकले सुलभ ब्याजदरमा सरलीकृत तवरले कर्जा प्रवाह गरिरहेको जनाएको छ ।

घर खरिद गर्न अथवा घर निर्माण गर्न र स्वदेशमै उद्यम गर्न चाहनेहरूका लागि लाभदायक महालक्ष्मी आवास कर्जा र महालक्ष्मी व्यावसायिक कर्जा आकर्षक ब्याजदरमा बैंकका सम्पूर्ण शाखाहरूबाट उपलब्ध हुनेछन् । देशका सहरी तथा ग्रामीण क्षेत्रका विभिन्न स्थानहरूमा एक सय तीनवटा शाखाहरूमार्फत यो सेवा उपलब्ध गराइएको पनि बैंकले जनाएको छ ।

क्याटेगोरी : बैंक बित्त बजार
ट्याग : #Page 6