सिद्धार्थ बैंकद्वारा आँखा अस्पताललाई सहयोग

काठमाडौं । सिद्धार्थ बैंकले नेपाल आँखा अस्पताललाई सहयोग गरेको छ । बैंकले काठमाडौंको त्रिपुरेश्वरस्थित नेपाल आँखा अस्पताललाई आँखा शल्यक्रियाको लागि पाँच लाख १२ हजार पाँच सय रुपैयाँ आर्थिक सहयोग गरेको जनाएको छ । सो रकम बैंकका तर्फबाट त्रिपुरेश्वर सर्कल अफिस प्रमुख अजय सिंह भण्डारीले नेपाल आँखा अस्पतालका अध्यक्ष डा. गोपाल प्रसाद पोखरेललाई हस्तान्तरण गरेका छन् ।

बैंकबाट प्राप्त उक्त सहयोग रकम नेपाल आँखा अस्पतालले काभे्रपलाञ्चोक, धादिङ, नुवाकोट र रसुवाजस्ता दुर्गम क्षेत्रका मोतिविन्दु रोगीहरूको पहिचान गरी उनीहरूको आँखा शल्यक्रिया गर्नका लागि उपयोग गर्नेछ । यो सहयोगबाट आर्थिक स्थिति कमजोर भएर मोतिविन्दु रोगको उपचार गर्न नपाएका बिरामीहरूको दृष्टि सुधार गर्न मद्दत पुग्ने विश्वास बैंकले लिएको छ ।

विभिन्न सामाजिक कार्यहरूमा सहभागिता जनाउँदै आएको बैंकले आगामी दिनमा पनि यस्ता सामाजिक कार्यहरूलाई सधैँ आफ्नो उच्च प्राथमिकतामा राखी निरन्तरता दिँदै जाने उद्देश्य राखेको छ ।