गोकर्णमा ज्योति विकास बैंकको शाखा

काठमाडौं । ज्योति विकास बैंकले बिहीबार काठमाडौंको गोकर्णमा एक सय २०औँ शाखा उद्घाटन गरेको छ । बैंकिङ सेवाको पहुँच विस्तार गर्दै गुणस्तरीय सेवा प्रदान गर्ने उद्देश्यले बैंकले नयाँ शाखा सञ्चालनमा ल्याएको हो ।

शाखाको उद्घाटन गोकर्णेश्वर नगरपालिकाका मेयर दिपककुमार रिसाल र बैंकका सञ्चालक रामकुमार श्रेष्ठले संयुक्त रुपमा गरेका छन् । उद्घाटन समारोहमा बैंकका वरिष्ठ नायब प्रमुख कार्यकारी अधिकृत कपिल ढकाललगायत विभिन्न पदाधिकारी, कर्मचारी, ग्राहक तथा स्थानीय व्यवसायीको पनि उपस्थिति रहेको थियो ।

उद्घाटन समारोहमा मेयर रिसालले बैंकको नयाँ शाखाले सो क्षेत्रका ग्राहकहरुका लागि बैंकिङ सेवा थप सुलभ र सहज बनाई वित्तीय समावेशीकरणलाई प्रवद्र्धन गर्न र उत्पादनशील क्षेत्रमा लगानी गर्दै आर्थिक वृद्धि र विकासमा टेवा पुग्ने विश्वास व्यक्त गरे । यस्तै बैंकका सञ्चालक रामकुमार श्रेष्ठले नयाँ शाखा स्थापना भएसँगै बैंकिङ सेवा थप विस्तार भएको र आगामी दिनमा पनि बैंकले सेवाग्राहीलाई अझ सहज, सरल र आधुनिक बैंकिङ सेवा प्रदान गर्ने बताए । बैंकका वरिष्ठ नायब प्रमुख कार्यकारी अधिकृत ढकालले बैंकले उद्यमशीलता र अर्थतन्त्रमा योगदान गर्ने ध्येय बोकी नागरिकहरुको समृद्धिमा सधैँ साथ दिने बताए ।