ठगीको साम्राज्य विस्तार नहोस्

काठमाडौं ।
पछिल्लो हप्ता आर्थिक विचलनको एउटा डरलाग्दो विवरण सार्वजनिक भयो । सहकारीले पूर्वउपराष्ट्रपतिदेखि पूर्वसचिवसम्मलाई ठगेको समाचारले सञ्चार माध्यमहरूमा प्रमुख ठाउँ पाए । यस्ता समाचारले देशमा अर्थको कारोबार कसरी चलिरहेको छ भन्ने कुरा प्रस्ट पार्छ । यो ठाउँमा उल्लेख भएका पदाधिकारीहरू, ती पूर्व नै किन नहुन् मर्यादित र निर्णायक ओहोदाधारी हुन् । यस्ता पदाधिकारीमाथि जस्तो व्यवहार भयो वा भनौँ संगठित संस्थाबाट सोझै लुट्ने काम भयो त्यो राज्यका लागि सामान्य होइन । यो कुरा बाहिर आएपछि उनीहरू खुलारूपले हिँड्न नपाउनुपर्ने हो । यदि त्यस्तो भयो भने कानुनी राज्यको अवधाराण समाप्त भएर लुटको प्रतिस्पर्धा चल्नेछ देशमा ।

तर दुःखद पक्ष हो दिनदहाडै यस्तो आर्थिक लुट भइरहेको अवस्थालाई यस्ता विशिष्ट व्यक्तिहरू आफैँ लाइनमा बसेर उजुरी दिन जानुप-यो । त्यसपछि पनि कारबाहीको कुनै भरपर्दो अवस्था प्रकट भएन । यो विवरण हो संघीय राजधानीको धुम्बाराही आनन्दनगरमा रहेको आनन्द नगर बचत तथा ऋण सहकारी संस्थाले गरेको एउटा काम यसका समाचारमा आएअनुसार यसका सञ्चालक र केही कर्मचारीको मिलेमतोमा पूर्वउपराष्ट्रपति, पूर्वसचिवसहित उच्च अधिकारीहरू नै ठगिनेमा परेका रहेछन् । यो एउटै सहकारीबाट यसरी ठगिनेको संख्या करिब १६ सयभन्दा बढी रहेको र रकमका हिसाबमा ५० करोडभन्दा बढी रहेको पाइयो ।

एउटा सहकारीले यतिठूलो संख्याका र यति उच्चातहका पूर्व र बहालवाला पदाधिकारी तथा सर्वधारण को ठगी भैरहेकोछ भने देशका दूरदराजको अवस्था के होला अनुमान गर्न पनि नसकिने हुनजान्छ । पीडितहरूले दिएका जानकारीअनुसार यस्तो ठगी गर्ने पूर्वसञ्चालक र व्यवस्थापकलाई दिएको रकम फिर्ता गर्न पटक–पटक अनुरोध गरी समय दिँदा समेत भुक्तानी नगरेपछि उजुरी पर्न गएको हो । यो सहकारी २०६५ सालमा स्थापना भएको थियो । सहकारीमा भीभीआईपीको समेत बचत खाता रहेको भन्दै सहकारीले अन्य सर्वसाधारणबाट पनि करोडौँ बचत सङ्कलन गरेको बताउँछन् पीडितहरू । सहकारीमा भीभीआईपीको समेत बचत खाता रहेको भन्दैे अन्य सर्वसाधारणलाई जसरी ठगियो त्यो आफैँमा सुनियोजित थियो भन्ने प्रस्ट हुन्छ ।

यसको अर्को दुःखद पक्ष हो जुन सहकारीमा भीभीआईपीको समेत बचत खाता रहेको भन्दै अन्य सर्वसाधारणलाई जसरी ठगियो त्यो रोलक्रममा स्वयम् ती भीभीआईपी आफैँ ठगिनेमा परे । टोलका स्थानीय मिलेर २०६५ सालमा स्थापना भएको सहकारीले २०६८ सालबाट नेतृत्वमा रहेका सञ्चालक समिति र व्यवस्थापकले ठगी गर्ने नियतले गलत अडिट रिपोर्ट तयार गरेर मुनाफा बढी देखाउन सुरु गरेका थिए भने धेरै बचत सङ्कलन गरेर ठगी गर्ने नियत राखेका थिए । यसले सञ्चालकहरू ठगीमा योजनाबद्ध लागेका थिए भन्ने बुझाउँछ ।

अबको अवस्था हो यिनीहरूमाथि सरकारले के गर्छ भन्ने । सहकारी जगतमा यसको नराम्रो सन्देश फैलिएको छ । यति ठूला मान्छे त ठगिन्छन् भने हाम्रो के होला भन्ने कुराले सर्वसाधारणमा भय फैलिएको छ । त्यसकारण यो घटनाको तत्काल छानबिन गरी दोषीमाथि कडा कारबाही हुन आवश्यक छ । नत्र ठगीको साम्राज्य झन् विस्तार हुँदै जाने खतरा बढ्छ । सम्बन्धित निकायहरूले ध्यान दिन जरुरी छ ।