आसियान उदीयमान उद्योगहरूमा सम्बन्ध विस्तार गर्न चीन इच्छुक

चीन । चीनले दक्षिणपूर्वी एसियाली राष्ट्रहरूसँग उदीयमान उद्योगहरूमा सहयोगको पहल सुरु गरेको छ । चीनको सेन्जेनमा आयोजित चीन–आसियान फोरम ‘उदीयमान उद्योगहरूमा सहयोगको पहल (सेन्जेन पहल)’ नामक कार्यक्रममा यस्तो प्रस्ताव गरेको हो ।

यस किसिमको पहलले चीन र दक्षिणपूर्वी एसियाली राष्ट्रहरूको संघ (आसियान)बीच थप समानुमातिक, समावेशी र रचनात्मक आपूर्ति श्रृंखला साझेदारी निर्माण गर्ने र पारस्परिक लाभदायक सहयोगलाई बढवा दिने बताइएको छ ।

सो मञ्चमा चीनका उद्योग तथा सूचना प्रविधि मन्त्री जिन जुआङलोङले चीन नयाँ विद्युतीय सवारीसाधन, डिजिटल अर्थतन्त्र र ऊर्जासँग सम्बन्धित इलोक्ट्रोनिक्सजस्ता उदीयमान उद्योगहरूमा केन्द्रित हुने सहयोग योजनाहरू कार्यान्वयन गर्न र उदीयमान उद्योगहरूका लागि सहयोगात्मक विकास मोडेल निर्माण गर्न इच्छुक रहेको बताएका हुन् ।

यसमा चीनले सहयोगका तीनवटा प्रमुख पक्षहरू प्रस्तुत गरेको छ । जसमा नवप्रवर्तनको क्षेत्रीय इकोसिस्टमको निर्माण, उदीयमान उद्योगहरूमा सहयोगलाई प्रोत्साहन गर्ने र औद्योगिक क्षेत्रमा चीन–आसियान मन्त्रीस्तरीय संवाद स्थापना गर्ने विषय समावेश गरेकोे छ । यस्तै, सरकारी निकायहरू, उद्यमहरू, शिक्षाविद्हरू, चेम्बर अफ कमर्स र संघहरूको सहकार्यलाई आह्वान गर्ने बताइएको छ । यसले चीन र दक्षिणपूर्वी देशहरूले डिजिटल अर्थतन्त्र, विद्युतीय सावारीसाधन, ऊर्जासँग सम्बन्धित इलेक्ट्रोनिक्स र अन्य उदीयमान उद्योगहरूमा सहयोग खोज्ने प्रस्ताव गरेको छ । यो प्रस्तावमा डिजिटल प्लेटफर्महरू विकास गर्ने, स्वच्छ ऊर्जा संक्रमणलाई प्रवद्र्धन गर्ने र उद्योगहरूमा सहयोगका लागि औद्योगिक पार्कहरू निर्माण गर्ने विषय समावेश गरिएको छ ।

यो पहलले आसियान सदस्य राष्ट्रहरूमा औद्योगिक, शैक्षिक र अनुसन्धान समुदायहरूलाई ग्लोबल डेभलपमेन्ट इनिसिएटिभअन्तर्गत नयाँ औद्योगिक साझेदारीको नेटवर्कमा समावेस गर्न प्रोत्साहन गर्ने बताइएको छ ।