एडीबीले बंगलादेशलाई १९ करोड डलर अनुदान दिने

बंगलादेश । एसियाली विकास बैंक (एडीबी)ले बंगलादेशको ग्रमीण सडक सञ्जाल परियोजनाका लागि १९ करोड अमेरिकी डलर अनुदान दिने भएको छ । एडीबीले बंगलादेशको ग्रामीण सडक सञ्जाल सुधारलाई थप विस्तार गर्न, ग्रामीण जीवनस्तर उकास्न र जलवायु तथा विपत् उत्थानशीलतामा लगानी गर्न यो रकम अनुदान स्वीकृत गरेको जनाएको छ ।

एडीबीको दक्षिण एसिया विभागको वातावरण, प्राकृतिक स्रोत तथा कृषि महाशाखाका प्रमुख ग्रामीण विकास विशेषज्ञ मासाहिरो निसिमुराले ग्रामीण सडक सञ्जाल परियोजनाका लागि बंगलादेशका लागि दिएको यो दोस्रो अतिरिक्त वित्तपोषण भएको बताए । मंगलबार जारी गरिएकोे विज्ञप्तिमा उनले भनेका छन्, ‘यो परियोजनाले ग्रामीण क्षेत्रमा यातायात दक्षता र विश्वसनीयता सुधार गर्न, कृषि उत्पादकत्व बढाउन र देशको दिगो आर्थिक वृद्धिमा मद्दत गर्न रोजगारी सिर्जना गर्न मद्दत गरिरहेको छ ।’

बंगलादेशमा सन् २०१८मा स्वीकृत भएको यो परियोजनाले एक हजार सात सय किलोमिटर ग्रामीण सडकको स्तरोन्नति गर्ने, ग्रामीण पूर्वाधार निकाय र सडक प्रयोगकर्ताको क्षमता अभिवृद्धि गर्ने र ग्रामीण सडक गुरुयोजनामा सुधार गर्ने लक्ष्य राखेको छ ।