चिनियाँ विदेश मन्त्री गाङ बर्खास्त

चीन । चिनियाँ विदेश मन्त्री चिन गाङ पदबाट बर्खास्त भएका छन् । उनी गतवर्षको डिसेम्बरमा विदेश मन्त्री नियुक्त भएका थिए । चीन सरकारले गाङलाई मंगलबार पदबाट बर्खास्त गरेको हो । गाङ एक महिनायता सार्वजनिक कार्यक्रममा देखिएका थिएनन् । गाङले एक महिनाअघि जुन २५मा श्रीलंका र रुसका विदेश मन्त्रीलाई भेटेका थिए । त्यसयता सार्वजनिक रुपमा देखिएका थिएन् ।

गाङको बर्खास्तीको कारणबारे केही खुलासा भएको छैन । राष्ट्रपति सी चिनफिङका निकट मानिने गाङ बर्खास्तीमा परेपछि घरेलु राजनीतिमा विभिन्न अड्कलबाजी भइरहेका छन् ।

गाङको बर्खास्तीपछि विदेश मन्त्रीको जिम्मेवारी कम्युनिस्ट पार्टीका विदेश मामिला प्रमुख वाङ यीले सम्हाल्नेछन् । वाङ यी दोस्रो पटक यो जिम्मेवारीमा पुगेका छन् । वाङ यी यसअघि सन् २०१३ देखि २०२२ को अन्तिमसम्म विदेश मन्त्री थिए । वाङ यी गत डिसेम्बरमा विदेशमन्त्रीबाट हटेपछि गाङ विदेशमन्त्री बनेका थिए ।