अमेरिकाले ताइवानलाई सैन्य सहायता दिने

अमेरिका । संयुक्त राज्य अमेरिकाले विवादित ताइवानका लागि सैन्य सहायता दिने घोषणा गरेको छ । अमेरिकाले ताइवानका लागि ३४ करोड ५० लाख डलरबराबरको सैन्य सहायता घोषणा गरेको हो । चीनले आफ्नो स्वसासित टापुप्रति चासो बढाइरहेका बेला अमेरिकाले यति ठूलो सैन्य सहयोगको प्याकेजको घोषणा गरेको हो ।

ह्वाइटहाउसले जारी गरेको विज्ञप्तिमा ताइवानलाई सैन्य शिक्षा र सहायाता गर्ने उल्लेख भए पनि हतियार वा उपकरण के दिने भन्नेबारेमा खुलाएको छैन । यद्यपि साना हतियारसहित अत्याधुनिक उपकरण सहयोग गर्न लागेको अनुमान सुरक्षा विज्ञहरूले गरेका छन् ।

अमेरिकाले सैन्य सहयोग गर्ने घोषणा गरेपछि चीनले ताइवानमा हतियार बेच्ने क्रम रोक्न चेतावनी दिएको छ । चीनले आवश्यक परे बल प्रयोग गरेर भए पनि ताइवानको पुनः एकीकरणमा लाग्ने चेतावनी दिएको छ । चीनले ताइवानमा उत्पन्न हुनसक्ने परिणामबारे अमेरिका जिम्मेवार हुने बताएको छ ।

अमेरिकाले ताइवानमा सन् २०२६सम्म ६६ वटा युद्धपोत विमान र आठ अर्ब अमेरिकी डलरभन्दा बढीको सहयोग गर्ने जनाइसकेको छ । यही कारण चीन र अमेरिकाबीच शीतयुद्ध चर्कने सम्भावना बढेको अनुमान गरिएको छ । ताइवानमा अमेरिकी झुकाव बढ्दै गएपछि यस वर्षको सुरुदेखि नै चीनले ताइवान आसपासमा ठूलो सैन्य अभ्यास गरिरहेको छ ।