अन्तर्राष्ट्रिय बजारमा कच्चा तेलको भाउ महँगिदै

साउदी । साउदी अरबले तेल उत्पादन कटौती गर्ने घोषणा गरेपछि अन्तर्राष्ट्रिय बजारमा कच्चा तेलको भाउ बढ्न थालेको छ । सोमबार अन्तर्राष्ट्रिय बेन्चमार्कमा ‘ब्रेन्ट क्रुड’को मूल्य प्रतिब्यारेल ८६ दशमलव ६७ डलरसम्म पुगेको छ । यो मूल्य चार महिनायताकै उच्च हो । यसअघि अप्रिल १७का दिन प्रतिब्यारेल ८६ दशमलव ५२ डलर पुगेको थियो ।

साउदी अरबले शुक्रबार थप एक महिना अर्थात् सेप्टेम्बर महिनाभर प्रतिदिन १० लाख ब्यारेल तेल उत्पादन घटाउने निर्णय गरेको थियो । रुसले पनि निर्यात कटौती गर्ने बताइरहेको छ । यस्तै, युक्रेनले रुसबाट तेल निर्यात हुने प्रमुख बन्दारगाहमा ड्रोन हमला गरेपछि तेलको भाउ अझै उकालो लाग्ने विश्लेषण विश्वबजारमा गरिएको छ ।

तेल बजारको स्थिरता र सन्तुलनलाई समर्थन गर्ने उद्देश्यले ‘ओपेक प्लस’ देशहरूले गरेको सावधानीको प्रयासलाई सुदृढ गर्न स्वैच्छिक कटौती गरिएको साउदी अरबले बताएको छ । ओपेक राष्ट्रहरुले कच्चा तेलको मूल्य नघटोस् भन्ने चाहन्छन् । साउदी अरबको तेल कटौती गर्ने कदमले केही समयको लागि मूल्यलाई समर्थन गरेको भए पनि स्थायी सुधार ल्याउन असफल भएको छ । युक्रेनमा रुसी आक्रमण र चीनको कमजोर आर्थिक पुनरुत्थानको निरन्तर परिणामलाई प्रतिविम्बित गर्दै तेल उत्पादकहरू घट्दो मूल्य र उच्च बजार अस्थिरतासँग जुधिरहेका छन् ।