रुस–युक्रेन युद्ध अन्त्य गर्ने प्रयासमा टर्की

रुस । रुसी विदेशमन्त्री सेर्गेइ लाभरोभको मैत्रीपूर्ण निमन्त्रणामा टर्कीका विदेशमन्त्री हाकान फिदान बिहीबार रुसको भ्रमणमा पुग्ने भएका छन् । विदेशमन्त्री फिदानले गतसाता युक्रेनी अधिकारीहरूसँग वार्ता गरेपछि उनको मस्को भ्रमण घोषणा भएको हो ।

टर्कीका राष्ट्रपति रेसेप तैयप एर्डोगान पनि सुरक्षितरूपमा खाद्यान्न ढुवानी गर्ने वातावरण मिलाउन तथा यसअघि भएको त्रिपक्षीय सम्झौतालाई पुनर्जीवित गर्ने सम्बन्धमा राष्ट्रपति भ्लादिमिर पुटिनसँग वार्ता गर्न चाँडै रुसको भ्रमणमा पुग्ने बताइएको छ ।

रुसी विदेश मन्त्रालयका प्रवक्ता मारिया जाखारोभाले विदेशमन्त्री लाभरोभ र हाकान फिदानबीच युक्रेन, सिरिया, लिबियालगायत मामिलाबारे छलफल गर्ने बताएकी छिन् ।

राष्ट्रपति एर्दागानले मस्को र किएभसँगको आफ्नो राम्रो सम्बन्धलाई सदुपयोग गर्दै दुवै पक्षलाई औपचारिक शान्ति वार्तामा ल्याउने प्रयास गरेका छन् । उत्तर एटलान्टिक सन्धि संगठन (नेटो) सदस्य टर्कीले गतवर्ष द्वन्द्व सुरु भएपछि रुस, युक्रेन र राष्ट्र संघ सम्मिलित युक्रेनी बन्दरगाहहरूबाट अन्न ढुवानी गर्नेसम्बन्धी सम्झौता गराउन मुख्य भूमिका निर्वाह गरेको थियो । केही समयअघि रुसले एकपक्षीय रुपमा उक्त सम्झौताको म्याद स्वतः समाप्त भएको घोषणा गरेको थियो ।