चिनियाँ अर्थतन्त्र पाँच दशमलव दुई प्रतिशत बढ्ने

चीन । चालू वर्षमा चीनको कूल गार्हस्थ्य उत्पादन (जीडीपी) पाँच दशमलव दुई प्रतिशतले बढ्ने अनुमान गरिएको छ । यस्तै सन् २०२४ मा चीनको जीडीपी पाँच प्रतिशतले बढ्ने प्रक्षेपण गरिएको छ ।

अन्तर्राष्ट्रिय वित्तीय मञ्च (आईएफएफ) प्रतिवेदनले सन् २०२३ मा भन्दा २०२४ मा अर्थतन्त्रको वृद्धिदर कम हुने प्राक्षेपण गरेको हो । चीनको दक्षिणी प्रान्त गुआङ्डोङको ग्वाङ्जाउमा आयोजित आईएफएफको २०औँ वार्षिक बैठकमा सार्वजनिक गरिएको प्रतिवेदनमा आर्थिक वृद्धिदर सुस्त हुँदै जाने उल्लेख छ ।

प्रतिवेदनमा अधिकांश मुलुकमा मौद्रिक कडाइको चक्र सन् २०२४ सम्ममा समाप्त हुने सम्भावना रहेको उल्लेख छ । तर मौद्रिक र वित्तीय कडाइ जारी रहने सम्भावनालाई भने कायमै राखेको छ ।

आईएफएफले सन् २०२३ र २०२४मा वैश्विक अर्थतन्त्र तीन दशमलव एक प्रतिशतको दरले बढ्ने अनुमान गरेको छ ।

वैश्विक समुदायले अल्पकालीन र दीर्घकालीन दुवै चुनौतीहरूको सम्बोधन गर्न मिलेर काम गर्नुपर्ने प्रतिवेदनमा औँल्याइएको छ । प्रतिवेदनमा भनिएको छ, ‘गरिबी न्यूनीकरण, पर्यावरणको संरक्षण र जलवायु परिवर्तनलाई न्यूनीकरण, अन्तरदेशीय द्वन्द्व समाधान गर्ने र भू–राजनीतिक तनाव कम गर्नेजस्ता साझा चुनौतीहरूको सामना गर्न अन्तर्राष्ट्रिय सहयोग र बहुपक्षीयतालाई अगाडि बढाउन आवश्यक छ ।’