तेल ट्यांकरमाथि इरानको ड्रोन आक्रमण

वासिङ्टन डीसी । इरानले हिन्दमहासागरमा एक तेल ट्यांकरमाथि ड्रोन हमला गरेको अमेरिकाले दाबी गरेको छ । पेन्टागनका अनुसार केम प्लूटो पानीजहाज भारतीय तटभन्दा तीन सय ७० किलोमिटर पर रहेको अवस्थामा इरानले ड्रोन आक्रमण गरेको हो । उक्त आक्रमणमा मानवीय क्षति भने भएको छैन । पानीजहाजमा लागेको आगो निभाइएको बताइएको छ । यसबारे इरानले कुनै प्रतिक्रिया जनाएको छैन ।

इरानको समर्थनप्राप्त यमनका हुथी विद्रोहीहरुले बारम्बार ड्रोन आक्रमण गरिरहेको अमेरिकाले दाबी गरेको छ । सो क्षेत्रमा गस्ती गरिरहेको यूएसएस लबुन नामक युद्धपोतले चारवटा मानवरहित ड्रोन खसालिदिएको जनाएको बीबीसीले उल्लेख गरेको छ । सोही दिन दक्षिणी लालसागरमा एउटा कच्चा तेल बोकेको ट्यांकरमाथि हुथी ड्रोनबाट आक्रमण भएको थियो । अमेरिकाले हुथी विद्रोही समूहले गाजामा युद्धले निरन्तरता पाइरहेककाले इजरायलसँग सम्बन्धित पानीजहाजलाई निसाना बनाइरहेको दाबी गरिएकोे छ ।