भारतमा चार सय ४९ खर्बको अन्तरिम बजेट

नयाँदिल्ली । भारतीय प्रधानमन्त्री नरेन्द्र मोदीको दोस्रो कार्याकालको अन्तिम बजेट सार्वजनिक भएको छ । केन्द्रीय वित्तमन्त्री निर्मला सीतारमणले बिहीबार अन्तरिम बजेट प्रस्तुत गरेकी हुन् । वित्तमन्त्री सीतारमणले भारतीय संसदमा चार सय ४९ खर्ब भारतीय रुपैयाँ बराबरको अन्तरिम बजेट प्रस्तुत गरेकी हुन् । सन् २०२४ मा भारतमा आम निर्वाचन हुँदैछ । भारतमा चुनावी वर्षमा अन्तरिम बजेट प्रस्तुत हुने गर्छ । वित्तमन्त्री सितारमणले पछिल्लो १० वर्षमा भारतको अर्थतन्त्रले ठूलो फड्को मारेको बताएकी छिन् ।

सरकारले बजेट प्रस्तुत गरिरहँदा भारतीय सेयर बजारमा उतारचढाव देखिएको थियो । प्रमुख बेन्चमार्क परिसूचक उतारचढावपछि घटेर बन्द भएको छ । बिएसई सेन्सेक्स एक सय छ दशमलव ८१ अंकले घटेर ७१ हजार छ सय ४५ विन्दुमा र निफ्टी फिप्टी २८ दशमलव २५ अंकले घटेर २१ हजार छ सय ९७ विन्दुमा कायम भएको छ ।

वित्तमन्त्री सितारमणले नेपाललाई दिने अनुदान पनि बढाएकी छन् । भारतले आर्थिक वर्ष २०२४/२५मा नेपाललाई छ अर्ब ५० करोड भारु दिने भएको छ । यसअघि भारतले आर्थिक वर्ष २०२३/२४मा नेपाललाई पाँच अर्ब ५० करोड भारु छुट्याएको थियो ।