भारतमा कोरोना संक्रमण र मृत्युदर घट्न थाल्यो

नयाँ दिल्ली ।
विगत २४ घण्टामा कोभिड–१९ बाट थप संक्रमितको संख्या ६१ हजार २६७ रहेको संघीय स्वास्थ्य मन्त्रालयले मंगलबार जानकारी गराएको छ । भारतमा अहिलेसम्म कुल संक्रमितको संख्या ६६ लाख ८५ हजार ८२ पुगेको मन्त्रालयले जनाएको छ । विगत २४ घण्टामा देशभर मृत्यु हुनेको संख्या ८८४ रहेको छ भने अहिलेसम्म कूल एक लाख तीन हजार ५६९ पुगेको सरकारी अधिकारीले पुष्टि गरेका छन् । यो महिना (अक्टोबर)को पहिला पाँच दिनको तथ्यांक हेर्दा भारतमा कोभिड–१९ संक्रमण तथा संक्रमित बिरामीको मृत्युदरमा सामान्य कमी देखिएको छ ।

अक्टोबर १ का दिन ८६ हजार आठ सय २१ व्यक्तिमा कोरोनाभाइरस संक्रमण पुष्टि भएको र मृत्यु एक हजार एक सय ८१ रहेकोमा अक्टोबर २ मा संक्रमितको संख्या करिब पाँच हजारले कमी आई ८१ हजार चार सय ८४ भएकोे थियो । त्यस्तै मृत्यु संख्यामा पनि करिब एक सयले कमी आई एक हजार ९५ मा झरेको थियो । महिनाको तेस्रो दिन संक्रमितको संख्या अघिल्ला दिनको तुलनामा थप कमी आई ७९ हजार चार सय ७६ कायम भएको थियो भने मृत्यु संख्या एक हजार ६९ मा झरेको थियो । अक्टोबरमा ४ मा संक्रमितको संख्यामा थप कमी आई ७५ हजार आठ सय २९ र मृतक संख्या नौ सय ४० भयो भने अक्टोबर ५ मा संक्रमितको संख्या ७४ हजार चार सय ४२ भयो र नौ सय तीन संक्रमितको मृत्यु भयो ।

भारतमा अहिलेसम्म ५६ लाख ६२ हजार चार सय ९० व्यक्ति कोभिड–१९ संक्रमणमुक्त भइसकेका छन् भने अझै पनि नौ लाख १९ हजारभन्दा बढी व्यक्तिमा संक्रमण रहेको छ । भारतीय चिकित्सा अनुसन्धान परिषद् (आईसीएमआर) का अनुसार भारतमा मङ्गलबारसम्म कुल ८१ लाख ७१ हजार सात सय ९७ व्यक्तिको कोभिड–१९ परीक्षण भएको छ । योमध्ये सोमबार मात्र एक लाख ८९ हजार चार सय तीन व्यक्तिको कोभिड–९ परीक्षण भएको बताइएको छ ।