भारतमा कार बिक्री महामारीमा पनि उच्च

नयाँ दिल्ली ।
भारतमा गत वर्षको तुलनामा यो वर्ष १७.५ प्रतिशतले बढी कार बिक्री भएको छ । कोरोना महामारीका बीच २०१९ अक्टोबर महिनाको तुलनामा २०२० को अक्टोबरमा करिब ५० हजार बढी कारहरु बिक्री भएका हुन् । गत वर्षको सोही महिनामा कुल २ लाख ८४ हजार ८ थान कार बिक्री भएकामा गत अक्टोबरमा कुल ३ लाख ३३ हजार ७ सय ५९ थान कार बिक्री भएको हो ।

भारतीय अटो कम्पनीले नोभेम्बर महिनामा दीपावली भएको हुँदा बजार अटोबजार अझै चलायमान हुने आशा गरेका छन् । अक्टोबरमा सबैभन्दा बढी गाडी मारुती सुजुकीले बिक्री गरेको भारतीय सञ्चारमाध्यमले जनाएका छन् । बजार हिस्साको ४९ दशमलव २ प्रतिशत ओगट्दा दोस्रोमा रहेको हुन्डाईले १६ दशमलव ९६ प्रतिशत छ ।
एक महिनामा सुजुकीले १ लाख ६३ हजार ६ सय थान कार बिक्री गरेको छ । जुन अघिल्लो वर्षको सोही महिनामा बिक्री भएको १ लाख ३९ हजार १ सय २१ थानको तुलनामा १७ दशमलव ६ प्रतिशतले बढी हो । त्यसैगरी हुन्डाईले १३ दशमलव १८ प्रतिशतले बजार बजार बढाउँदै गत वर्ष ५० हजार १० थान बिक्री गरेकोमा यो वर्ष ५६ हजार ६ सय बिक्री गरेको छ ।

महिन्द्रालाई उछिनेर टाटा तेस्रो स्थानमा बनाउँदै २३ हजार ६ सय थान कार बिक्री गरेको छ । महिन्द्राले जम्मा १८ हजार ६ सय बिक्री गरेको छ। महिन्द्रालाई किया मोटर्सले समेत पछि पारेको छ। कियाले यो अवधिमा २१ हजार २१ थान कार बिक्री गरेको छ। रेनो, फक्सवागन र निसानले बजार हिस्सा गुमाएका छन् । रेनोले गत वर्षको सोही अवधिमा कुल ११ हजार ५ सय १६ थान कार बिक्री गरेकोमा यो वर्ष ११ हजार ५ थान बिक्री गरेको छ । त्यसैगरी फक्सवागनले २ हजार ५४ थानमा सीमित भएको छ। निसानले ९ सय ८३ थान बिक्री गरेको छ ।

हिरोले बेच्यो ८ लाख मोटरसाइकल : यसैबीच, हिरो मोटोकर्पले भारतमा अक्टोबर महिनामा मात्रै ८ लाख मोटरसाइकल तथा स्कुटर बिक्री गरेको छ । कोभिड १९को अवस्थामा पनि गतवर्षको तुलनामा ३५ प्रतिशत बढीले बिक्री गरेको हो । हिरोले अक्टोबर महिनामा भारतीय बजारमा ८ लाख ६ हजार युनिट मोटरसाइकल तथा स्कुटर बिक्री गरेको छ । जब कि गत वर्षको सामान्य अवस्थामा अक्टोबर महिनामा ५ लाख ९९ हजार युनिट मोटरसाइकल तथा स्कुटर बिक्री गरेको थियो ।

कम्पनीले ग्राहकको माग, सरकारको नीतिगत सहयोग, सप्लाई चेनमा सुधार गर्दा व्यापार बढाउन सफल भएको बताएको छ । नोभेम्बर महिना चाडपर्वको समय भएकाले झन् बिक्री बढ्ने कम्पनीले विश्वास बढेको छ । अक्टोबर महिनामा भारतमा माएस्ट्रो ऐज १२५ स्कुटर, १२५ सीसीकै ग्लामर ब्लाजाको स्पेशल इडिसन, ११० सीसीको स्पेन्टर ब्लाक नयाँ प्रोडक्टको रुपमा बजारमा ल्याएको थियो ।