पाकिस्तानका शैक्षिक संस्थाहरु फेरि बन्द, परीक्षा स्थगित

इस्लामाबाद ।
कोरोना संक्रमितहरुको संख्यामा वृद्धि हुँदै गएपछि पाकिस्तानमा फेरि शैक्षिक संस्थाहरु बन्दको घोषणा गरिएको छ । सरकारी अधिकारीहरुले सोमबार गरेको घोषणाअनुसार आगामी बिहीबारदेखि शैक्षिक संस्थाहरु बन्द हुने भएका हुन् । घोषणामा शैक्षिक संस्था अर्को वर्षको जनवरी १० तारिखसम्म बन्द गर्ने उल्लेख गरिएको छ । शैक्षिक संस्थाहरु बन्द हुने भएपछि अहिले तय गरिएका सवै परीक्षाहरु पनि स्थगित गरिएको अधिकारीहरुले जानकारी दिएका छन् ।

यसैगरी इन्डोनेसियाको स्वास्थ्य मन्त्रालयले इन्डोनेसियामा थप चार हजार चार सय ४२ जना संक्रमित थपिएको तथ्यांक सार्वजनिक गरेको छ । पछिल्लो पटक थपिएकाहरुसँगै इन्डोनेसियामा अहिलेसम्म कुल संक्रमितको संख्या पाँच लाख दुई हजार एक सय १० पुगेको छ । इन्डोनेसियामा अहिलेसम्म कोरोनाभाइरसबाट संक्रमित भएर मृत्यु भएकाहरुको संख्या १६ हजार दुई पुगेको पनि मन्त्रालयका अधिकारीहरुले जनाएका छन् । मलेसियामा एक हजार आठ सय ८४ जना नयाँ संक्रमित थपिएका छन् भने कुल संक्रमितहरु ५६ हजार छ सय ५९ जना रहेका छन् ।