भारतबाट डेढ अर्ब डलरको स्मार्टफोन निर्यात हुने अनुमान

नयाँ दिल्ली ।
सन् २०२० मा भारतबाट डेढ अर्ब अमेरिकी डलरको स्मार्टफोन निर्यात हुने अनुमान गरिएको छ । टेलिकम रिसर्च कम्पनी टेकएआरसीले सोमबार यससम्बन्धी मोबाइल फोन निर्यात प्रतिवेदन सार्वजनिक गर्दै उक्त अनुमान गरेको भारतीय मिडियाले जनाएका छन् । कम्पनीको विश्लेषणअनुसार सेप्टेम्बरसम्म नै १ अर्ब ३० करोड अमेरिकी डलरको स्मार्टफोन निर्यात भइसकेको छ ।

त्यस्तै भारतीय वाणिज्य मन्त्रालयले सार्वजनिक गरेको अगस्टसम्मको तथ्यांकअनुसार १ हजार ७ सय ८१ करोड भारु मूल्यबराबरको स्मार्टफोन निर्यात भएको थियो । जुन मार्च महिनाको ९ सय ७६ करोड भारुको तुलनामा अत्यधिक हो । तथ्यांकअनुसार जनवरीदेखि सेप्टेम्बरसम्म भारतबाट कुल १ करोड २८ लाख मोबाइल फोन निर्यात भएका थिए । त्यसमा १ करोड ९ लााख वटा स्मार्टफोन रहेको अध्ययन प्रतिवेदनले देखाएको छ ।

त्यस्तै फोन निर्यातमा कोभिड १९ को असर पनि देखिएको छ । जनवरी–मार्च अवधिमा ७४ लाखवटा स्मार्टफोन निर्यात भएकोमा अप्रिल जुन अवधिमा केवल १२ लाखवटा मात्रै निर्यात भएको छ । तर पुनः निर्यातमा सुधार हुँदै जुलाई–सेप्टेम्बरमा ४२ लाख युनिट स्मार्टफोन निर्यात भएको रिपोर्टले देखाएको छ । भर्खरै ल्याइएकोा पीएलआई स्किमले स्मार्टफोन निर्यातमा सुधार गर्ने अपेक्षा गरिएको टाइम्स अफ इन्डियाले जनाएको छ । उक्त स्किम १६ इलेक्ट्रोनिक्स कम्पनीको पक्षमा रहेको छ । जसमा १० वटा मोबाइल हेन्डसेट बनाउने कम्पनी छन् ।