ब्रिटिश एयरवेजले आगामी वर्ष १५ लामा रुटमा उडान नगर्ने

लन्डन ।
बेलायती ध्वजावाहक ब्रिटिश एयरवेजले अर्को वर्ष १५ लामा रुटमा उडान नगर्ने भएको छ । महामारीका कारण धेरैजसो एयरलाइन्सहरुले कर्मचारी कटौतीसँगै उडान गन्तव्य घटाइरहेका बेला ब्रिटिश एयरवेजले यस्तो निर्णय लिएको हो । कम्पनीले उत्तर अमेरिकाको पिट्सबर्ग, क्याल्गरी र चाल्स्र्टन, एसियाको सोल, क्वालालम्पुर र ओसाकामा पनि उडान नगर्ने निर्णय गरेको छ ।

त्यस्तै द सिसिली पनि उडान गन्तव्यबाट हटेको छ । त्यस्तै मस्कट, जेद्दा र आबुधाबी रुट पनि रद्द गरिएको छ । सिड्नी, बैंकक र सान जोसेमा पनि कम्पनीले २०२१ को समरसम्म उडान नगर्ने जनाएको छ । बीएले रद्द भएका गन्तव्यमा काटिसकिएको टिकटको पूरै रकम फिर्ता दिइने स्पष्ट पारेको छ ।

महामारीले कम्पनीलाई नराम्रो असर गरेको यसअघि नै कम्पनीले बताउँदै आएको थियो । लकडाउन, यात्रा प्रतिबन्धजस्ता महामारी रोक्न विभिन्न देशले चालेका कदमले हवाइ क्षेत्रमा ठूलो आर्थिक नोक्सानी भएको छ । यो वर्षको आधाआधीसम्म कम्पनीले चार अर्ब पाउन्ड स्टर्लिङ नोक्सानी व्यहोरिसकेको छ ।