युरोपमा कोरोना संक्रमण बढ्नथालेपछि फेरि ओरालो लाग्यो कच्चा तेलको मूल्य

लन्डन ।
कच्चा तेलको मूल्य सोमबार तीन प्रतिशतले घटेको छ । बेलायत लगायत युरोपका केही देशमा कोरोना संक्रमण पुनः फैलिनथालेपछि गरिएको लकडाउनकाक कारण कच्चा तेलको मूल्य पुनः ओरालो लागेको हो । लकडाउनसँगै यसको मागमा समेत कमी आएको छ । रोयटर्सका अनुसार ब्रेन्ट क्रुड १.५४ अमेरिकी डलर अर्थात् तीन प्रतिशतले सस्तो भएर ५०.७२ अमेरिकी डलर प्रतिब्यारेलमा कारोबार भएको छ ।

त्यस्तै अमेरिकी वेस्ट टेक्सस इन्टरमेडिएट (डब्लुटीआई) कच्चा तेल १.४२ अमेरिकी डलर अर्थात् २.९ प्रतिशतले सस्तो भएर ४७.६८ अमेरिकी डलर प्रतिब्यारेल कायम भएको छ । लगातार सातौँ हप्तासम्म बढेको कच्चा तेल पहिलोपटक घटेको हो । ब्रेन्ट क्रुड ५० डलर प्रतिब्यारेलबाट र डब्लुटीआई ४५ डलर प्रतिब्यारेलबाट अझै सस्तो हुनसक्ने बजार विश्लेषकहरुको अनुमान छ ।