न्युयोर्क स्टक एक्सचेन्जले चिनियाँ कम्पनीविरुद्धको कारबाही रोक्यो

अमेरिका ।
अमेरिकी सेयरबजार निसे (एनवाईएसई) चिनियाँ कम्पनीहरुविरुद्ध थालेको कारबाही हाललाई रोकेको छ । बीबीसीका अनुसार तीन चिनियाँ दूरसञ्चार कम्पनीलाई सूचीकरणबाट हटाउने घोषणा गरेको निसे आफ्नो निर्णयबाट पछि हटेको हो । गत डिसेम्बर ३१ मा चिनियाँ सेनाको स्वामित्व वा नियन्त्रणमा रहेको आरोपमा चिनियाँ कम्पनीलाई न्युयोर्क स्टक एक्सचेन्ज (निसे)ले सूचीकरणबाट हटाउने प्रक्रिया थालेको बताएको थियो ।

राष्ट्रपति डोनाल्ड ट्रम्पले नोभेम्बरमा एउटा कार्यकारी आदेश जारी गर्दै ३१ कम्पनीलाई चिनियाँ सेनाको स्वामित्व वा नियन्त्रणमा रहेको भन्दै अमेरिकामा लगानी गर्न नदिने बताएका थिए । सोही आदेशअनुसार निसेले चिनियाँ कम्पनीहरु चाइना मोबाइल लिमिटेड, चाइना टेलिकम कर्प लिमिटेड र चाइना युनिकर्न हङकङ लिमिटेडलाई सूचीकरणबाट हटाउने निर्णय गरेको थियो ।
तर अहिले फेरि नियामकीय अधिकारीसँग यसबारे थप परामर्श गर्ने भन्दै थालेको प्रक्रिया रोकेको छ । निसेले यही हप्ता चिनियाँ कम्पनीलाई हटाउने बताएको थियो । हटाउने बताएसँगै तीनवटै कम्पनीको सेयर सोमबार ५ प्रतिशतभन्दा बढीले हङकङ सेयरबजारमा घटेको थियो। तर पछिल्लो खबरसँगै उनीहरुको सेयर फेरि आकाशिएको छ ।

न्युयोर्क र हङकङको सेयरबजारमा कम्पनीहरुको सेयर बढेको छ । चाइना युनिकर्नको ८.५ प्रतिशतले, चाइना टेलिकमको ८ प्रतिशतले र चाइना मोबाइलको ७ प्रतिशतले सेयर बढेको बीबीसीले जनाएको छ । तीनवटै कम्पनीहरुले चीनमै अधिकांश आम्दानी गर्ने गरेका छन् र अमेरिकामा उनीहरुको उपस्थिति उल्लेख्य छैन । अरुजस्तै यी कम्पनी पनि अमेरिका र हङकङका दुवै सेयरबजारमा सूचीकृत छन् । अमेरिकी सेयरबजारहरुमा २ सयभन्दा धेरै चिनियाँ कम्पनीहरु सूचीकृत छन् । यी सबैको कुल बजार पुँजीकरण २२ खर्ब अमेरिकी अमेरिकी डलरबराबरको छ ।