गत वर्ष बंगलादेशले भित्र्यायो २१ अर्ब अमेरिकी डलर रेमिट्यान्स

ढाका ।
विदेशमा काम गर्न गएका बंगलादेशी कामदारले औपचारिक अर्थात् वैधानिक माध्यमबाट पैसा पठाउनथालेपछि बंगलादेशको रेमिट्यान्स आप्रवाह अहिलेसम्मकै उच्च भएको छ । बंगलादेशी मिडियाहरुका अनुसार सन् २०२०मा २१ अर्ब ७४ करोड अमेरिकी डलर रेमिट्यान्स भित्रिएको हो । केन्द्रीय बैंकका अनुसार अघिल्लो वर्षको आप्रवाहको तुलनामा यो १८.५९ प्रतिशतले बढी हो ।

डिसेम्बर महिनामा मात्रै प्रवासी बंगलादेशी कामदारले २ अर्ब ५ करोड अमेरिकी डलर पठाएका छन् । २ अर्ब डलरको आँकडा पार गरेको यो लगातार चौथो महिना भएको द डेलिस्टार अनलाइनले जनाएको छ । कोरोना महामारीका बेला रेमिट्यान्स आप्रवाह बढ्दा सरकारलाई समग्र अर्थतन्त्रको व्यवस्थापनमा सहयोग पुगेको छ । यसअघि सरकारको विदेशी विनिमय सञ्चिति पनि ४३ अर्ब डलर पुगेको छ । मार्च महिनामा यस्तो सञ्चिति ३२ अर्ब ३८ करोड अमेरिकी डलर रहेको थियो । उक्त महिना कोरोनाको प्रकोपले समग्र क्षेत्रमा प्रभाव पारेको थियो । विज्ञहरुले रेमिट्यान्स र सञ्चिति महामारी अन्त्य नहुँदासम्म बढिरहने आशा गरेका छन् ।

जनवरीदेखि मार्चसम्म सन् २०२० मा १ लाख ८१ हजार २ सय १८ जना बंगलादेशी विदेश गएको ब्युरो अफ म्यानपावर, इम्प्लोयमेन्ट एन्ड ट्रेनिङ (बीएमईटी)ले जनाएको छ । औसतमा प्रतिवर्ष बंगलादेशबाट ७ देखि ८ लाखसम्म मानिसहरु विदेशमा काम गर्न जाने गरेका छन् । सन् २०१९ मा ७ लाख १ सय ५९ जना कामदार विदेशिएको बताइएको छ ।