ट्विटर र फेसबुकले ट्रम्पको एकाउन्ट घण्टौँसम्म ब्लक गरे

अमेरिका ।
अमेरिकी राष्ट्रपति डोनाल्ड ट्रम्पको दुई सामाजिक सञ्जाल फेसबुक र ट्विटरको एकाउन्ट घण्टौँसम्म ब्लक भएको छ । अमेरिकी संसद् भवनमा ट्रम्पका समर्थकले भड्किलो प्रदर्शन गरेपछि दुवै कम्पनीले एकाउन्ट ब्लक गरिदिएको एजेन्सीहरुले जनाएका छन् ।

ट्रम्पले समर्थकलाई सामाजिक सञ्जालमा समर्थकलाई ‘आई लभ यु’ भनेका थिए । पछि उनले समर्थकलाई हिंसामा नउत्रिन भने पनि संसद् भवनपरिसरमै प्रवेश गरेर तोडफोडमा उत्रिएका थिए । ट्विटरले आफ्नो नीतिविपरीत भन्दै ट्रम्पको एकाउन्ट बन्द गरेको थियो । कम्तीमा पनि ट्विटरले ८ घण्टा र फेसबुकले २४ घण्टासम्म एकाउन्ट ब्लक गरेको बताइएको छ ।

ट्विटरले थप भड्काउ सन्देश प्रवाह गरे सधैँका लागि एकाउन्ट बन्द गरिदिने चेतावनी दिएको बीबीसीले जनाएको छ । बिहीबार नवनिर्वाचित राष्ट्रपति जोय बाइडेनको विजय संसद्ले प्रमाणीकरण गर्ने भएपछि ट्रम्पका समर्थकले संसद् घेरेका थिए । प्रदर्शनलाई ट्रम्पले समेत सम्बोधन गरेका थिए । बाइडेनको विजयको प्रमाणीकरण रोक्न ट्रम्प समर्थकले अन्तिम प्रयासस्वरुप राजधानी वासिङटनमा प्रदर्शन गरेका हुन् ।

यसका बाबजुद बाइडेनको विजयलाई संसद्ले प्रमाणीकरण गरेको छ । त्योसँगै ट्रम्पले शान्तिपूर्ण सत्ता हस्तान्तरण गर्ने बताएका छन् । एकाउन्ट ब्लक भएपछि ह्वाइटहाउसको सामाजिक सञ्जाल निर्देशक डान स्काभियोले आफ्नै एकाउन्टबाट ट्रम्पको सत्ता हस्तान्तरणसम्बन्धी सन्देश प्रवाह गरेका थिए । ट्रम्पले सत्ता हस्तान्तरण गर्ने बताए पनि निर्वाचन धाँधलीपूर्ण भएकोले नतिजा नस्वीकारेको बताएका छन् ।

ट्विटरले जस्तै फेसबुक र इन्स्टाग्रामले पनि ट्रम्पको एकाउन्ट २४ घण्टासम्म ब्लक गरेका थिए । दुवै मार्क जुकरबर्गका कम्पनी हुन् । स्न्यापच्याटले समेत ट्रम्पका नयाँ पोस्टमा प्रतिबन्ध लगाएको थियो । बिहीबारको प्रदर्शनमा प्रहरीसँगको घम्साघम्सीपछि ट्रम्प समर्थक चार जनाको मृत्यु समेत भएको बताइएको छ ।

गत नोभेम्बर ३ मा अमेरिकी राष्ट्रपतीय चुनाव भएको थियो । मतगणनामा ट्रम्प धेरै राज्यमा अगाडि भए पनि मेल इन ब्यालोट्स अर्थात् हुलाकबाट मतदान भएका मतजति बाइडेनको पक्षमा गएको थियो । रिपब्लिकन ट्रम्प र डेमोक्रेटिक बाइडेनबीचको कडा प्रतिस्पर्धामा हुलाकी मतले निर्णायक भूमिका खेलेपछि ट्रम्प पराजित भएका थिए । तर ट्रम्पले निर्वाचन सकिएको हप्तौँसम्म पनि हुलाकी मतदानको मतलाई वैधता दिएको भन्दै रुष्ट हुँदै आएका छन् । यसलाई उनले अवैध मतदान भएकोले जित आफ्नै भएको दाबी गर्दै आएका छन् । उनले विभिन्न राज्यमा निर्वाचनबारे उजुरी दिए पनि अदालतले उनको दाबी अस्वीकार गरेको थियो ।

यसबाट ट्रम्प समर्थक दुःखी हुँदै प्रदर्शनमा उत्रिएका हुन् । अमेरिकी इतिहासमै सबैभन्दा बढी मतदान भएको निर्वाचनमा ट्रम्पले दोस्रो कार्यकाल जित्ने आकलन गरिए पनि कोरोना महामारीमा आलोचित हुनपुगेका ट्रम्पको पराजय पनि कोरोना नै बन्न पुगेको हो । अमेरिकामा कोरोनाबाट तीन लाख हाराहारीमा मृत्यु भएको छ ।