भारतमा ह्वाट्सएपविरुद्ध पहिलोपटक मुद्दा दर्ता

नयाँ दिल्ली ।
पछिल्लो परिवर्तित नीतिलाई लिएर भारतमा सामाजिक सञ्जाल कम्पनी ह्वाट्सएपविरुद्ध पहिलोपटक मुद्दा दायर भएको छ । भारतको सुरक्षालाई नजरअन्दाज गर्ने र प्रयोगकर्तामाथि निगरानी बढाउने गरी नीतिगत परिवर्तन भएको भन्दै बिहीबार अदालतमा मुद्दा दायर भएको बताइएको छ ।

ह्वाट्सएप फेसबुककै मातहतको कम्पनी हो । यसले फेसबुकमाथि अर्को दबाब परेको छ । क्यालिफोर्नियामा मुख्यालय भएको कम्पनीले गत जनवरी ४ मा केही तथ्यांक, ठेगान र फोन नम्बरहरु फेसबुक र यसका इन्स्टाग्राम र मेसेन्जरलाई नबाँड्ने गरी सञ्चित गरेको बताएको थियो । योसँगै सार्वजनिक तहमा ह्वाट्सएपको आलोचना बढेको बताइएको छ । भारतमा ह्वाट्सएप प्रयोगकर्ताको संख्या ४० करोडभन्दा बढी छ । यो परिवर्तनविरुद्ध टर्कीमा पनि मुद्दामामिला सुरु भइसकेको छ ।

भारतमा आक्रोशित प्रयोगकर्ताले ह्वाट्सएपको साटो सिग्नल र टेलिग्रामजस्ता एप प्रयोग गर्न थालेका छन् । गोप्यमामिलासम्बन्धी नागरिकको अधिकारको धज्जी उडाएको अदालतमा दायर रिटमा बताइएको छ । यसको सुनुवाइ दिल्ली उच्च अदालतमा शुक्रबार हुनेछ । ह्वाट्सएपले यसबारे केही धारणा सार्वजनिक गरेको छैन ।