अम्बानीले रिलायन्सको बागडोर सम्हालेपछि लगानीकर्ता मालामाल

नयाँ दिल्ली । चर्चित भारतीय अर्बपति मुकेश अम्बानीले वार्षिक १५ करोड भारु तलब लिने गरेका छन् । पछिल्लो ११ वर्षयता उनको तलब यही स्तरमा छ ।

बजार पुँजीका हिसाबले उनको रिलायन्स इन्डस्ट्रिज भारतकै सबैभन्दा ठूलो कम्पनी हो । अम्बानी यसका प्रमुख हुन् । तर कोभिड महामारीका दुई वर्ष उनले तलब नै लिएका छैनन् । रिलायन्सको बागडोर सम्हालेपछि उनले कम्पनीका लगानीकर्तालाई मालामाल बनाएका छन् । अम्बानी १ खर्ब ४ अर्ब डलर मूल्यवान रिलायन्स हाँकिरहेका छन् । ब्लुमबर्ग अर्बपति सूचीअनुसार अम्बानी विश्वको १२औँ ठूला अर्बपति हुन् ।

अम्बानीले आफूसँगै लगानीकर्तालाई पनि मालामाल बनाएका छन् । उनले रिलायन्सको बागडोर सम्हालेयता धेरै नयाँ कारोबार सुरु गरेका छन् । उनले आफ्नो बुबाको निधनपछि सन् २००२ मा रिलायन्सको नेतृत्व लिएका थिए । त्यसयता कम्पनीले ठूलो प्रगति गरेको छ । अहिले कम्पनीको बजार पुँजी १५.८४ लाख करोड भारु पुगेको छ । सन् २००३ को जनवरीमा कम्पनीको सेयर करिब ५५ भारु स्तरमा मात्र कारोबार गरिरहेको थियो । जब कि अहिले यसको सेयर प्रतिकित्ता २ हजार ३ सय ५३ भारुको तहमा पुगिसकेको छ ।

यसरी हेर्दा उनले लगानीकर्तालाई ४ हजार १ सय ४२ प्रतिशत आम्दानी दिएका छन् । उदाहरणको लागि कसैले २० वर्षअघि कम्पनीको सेयरमा १ लाख लगानी गरेको थियो भने अहिले त्यसको मूल्य ४२ लाख भारुभन्दा धेरै पुगिसकेको छ ।

कमाउने मात्र होइन उनले दानमा पनि पैसा खर्चिने गरेका छन् । उनी दान गर्नमा सबैभन्दा अगाडि रहेको नवभारत टाइम्सले उल्लेख गरेको छ । हुरुनको दातासूचीअनुसार अम्बानी भारतका तेस्रो ठूलो दानवीर हुन् । उनले गत वर्ष करिब ४ अर्ब ११ करोड भारु दान गरेका थिए ।