ड्रोन आक्रमणबाट पुटिनको हत्या प्रयास गरेको रुसको आरोप

मस्को । रुसले युक्रेनमाथि राष्ट्रपति भ्लादिमिर पुटिनको हत्या प्रयास गरेको आरोप लगाएको छ । ड्रोन प्रयोग गरी हत्या प्रयास गरिएको रुसले आरोप लगाएको हो ।

मध्यमस्कोस्थित क्रेमलिनको पुटिन आवासमा ड्रोनमार्फत आक्रमण भएको रुसी दाबी छ । रुसी राष्ट्रपतिको कार्यालयले अघिल्लो रातभरिमा दुईवटा ड्रोन खसालेको पुटिनका प्रवक्ताले बताएका छन् ।

सामाजिक सञ्जालमा पनि क्रेमलिनको राष्ट्रपतीय निवासमाथि ड्रोन उडेको र विस्फोट भएको दृश्य भाइरल बनिरहेको छ । तर युक्रेनका राष्ट्रपति भोलोदिमिर जेलेन्स्कीले भने यस घटनामा युक्रेन संलग्न नरहेको भन्दै आरोपको खण्डन गरेका छन् ।

‘हामी पुटिन वा मस्कोमाथि आक्रमण गर्दैनौँ, हामी हाम्रै भूभागका लागि मात्रै लड्छौँ । हामी हाम्रो सहर र गाउँको रक्षा गरिरहेका छौँ’, फिनल्यान्डमा भ्रमणका क्रममा रहेका उनले भनेका छन् । एक युक्रेनी राष्ट्रपतिका सल्लाहकारले भने युक्रेनमाथि ठूलो आक्रमण गर्न रुसले निहुँस्वरुप आफैँले घटना घटाएको बीबीसीसँग बताएका छन् ।