युक्रेनको काखोभका बाँधमा विस्फोट

युक्रेन । दक्षिणी युक्रेनमा रहेको काखोभका जलविद्युत् आयोजनाको बाँधमा विस्फोट भएपछि आंशिक क्षति भएको छ । विस्फोटले बाँध भत्किएको छ । रुसी नियन्त्रणमा रहेको खेरसेन क्षेत्रमा रहेको नोभा काखोभका बाँधलाई ध्वस्त पारेको भन्दै रुस र युक्रेनले एक–अर्कालाई आरोप प्रत्यारोप गरेका छन् ।

दक्षिणी युक्रेनमा मस्को–स्थापित अधिकारीहरूले मंगलबार यसबारे सार्वजनिक टिप्पणी गरेका हुन् । नोभा काखोभका सहरको मस्को–समर्थित प्रशासनका प्रमुख भ्लादिमिर लियोन्टिएभले रातभरि बाँधलाई लक्षित गरी थुप्रै आक्रमण भएको बताए । बाँधको गेटका भल्भहरू ध्वस्त भई पानी अनियन्त्रित भएपछि आसपासका बस्तीमा जोखिम बढेको बताइएको छ ।

युक्रेनी सेनाले द्निप्रो नदीमा बाढी आउनसक्ने भन्दै आसपासका बस्तीका मानिसहरूलाई अन्यत्र जान सुझाएको छ । युक्रेनले बाँध ध्वस्त भएपछि द्निप्रो नदीमा एक सय ५० टन तेल मिसिएको जनाएको छ ।

नेटो महासचिव जेन्स स्टोल्टेनवर्गले बाँधमा भएको आक्रमणको निन्दा गरेका छन् । उनले बाँधको विनाशले हजारौँ नागरिक जोखिममा परेको बताएका छन् । यसले युक्रेनमा रुस युद्धको क्रुरतालाई छताछुल्ल पारिदिएको टिप्पणी गरेका छन् । युरोपियन युनियनका प्रमुख चाल्र्स माइकेलले यस घटनामा रुस र उसको प्रतिद्वन्द्वी जिम्मेवार हुने बताएका छन् ।

युक्रेनले बाँध भत्काइएको घटना युद्ध अपराधको रूपमा छानबिन हुने जनाएको छ । उसले बाँधमा बिस्फोट हुँदा पर्यावरणीय नोक्सान भएको भनेको छ ।

रुसी अधिकारीहरूले भने युक्रेनले नै बाँध ध्वस्त पारेको बताएका छन् । जलविद्युत् बाँँधबाट युक्रेनले लक्ष्य हासिल गर्न नसकेपछि युक्रेनले नै विस्फोट गराएको रुसी अधिकारीहरूको आरोप छ । क्रेमलिन प्रवक्ता दिमित्री पेस्कोभले बाँध युक्रेनले नै ध्वस्त पारेको आरोप लगाएका हुन् ।