विश्व बजारमा गहुँ र मकैको मूल्य बढ्यो

अमेरिका । युक्रेनको कोखोभका बाँधमा विस्फोट भएपछि विश्व बजारमा गहुँ र मकैको भाउ बढेको छ । बाँध भत्किएपछि युक्रेनको खाद्यान्न ढुवानी गर्नसक्ने क्षमता घट्ने भयले विश्व बजारमा गहुँ र मकैको भाउ बढेको हो । युक्रेनबाट अफ्रिका, मध्यपूर्व र एसियामा खाद्यान्न ढुवानी हुँदै आएको छ ।

सिकागो मर्कन्टाइल एक्सचेन्जमा मंगलबार मकैको भाउ प्रतिबसेल एक प्रतिशतले बढेर छ डलर माथि पुगेको छ । गहुँको मूल्य प्रतिबसेल दुई दशमलव चार प्रतिशतले बढेर छ डलर ३९ सेन्टमा पुगेको छ । यसबाहेक जौ र सूर्यमुखी तेलको निर्यातमा अवरोध हुने भय पनि बढेको छ ।

रुस–युक्रेन युद्धका कारण विश्वको खाद्य बजारमा मूल्य असर पर्ने गरेको छ । रुस र युक्रेन दुवै विश्व बजारमा सबैभन्दा धेरै खाद्यान्न आपूर्ति देश हुन् । यही कारण रुस र युक्रेनमा हुने हरेक घटनापिच्छे विश्वबजारमा गहुँ, मकै, जौ र सूर्यमुखी तेलको मूल्य बढ्ने गरेको छ ।

रुस र युक्रेनबीच संयुक्त राष्ट्र संघको पहलमा खाद्यान्न निर्यात सम्झौता भई विश्वभर निर्यात भइरहेको छ । रुसले गतवर्ष कृष्ण सागर भएर हुने निर्यात सम्झौताबाट हात झिक्दा विश्वबजारमा गहुँ र खाने तेलको मूल्य आकाशिएको थियो ।