मोदीले बाइडेनलाई दिए दशदान प्रथम महिलालाई हिरा उपहार

अमेरिका । भारतीय प्रधानमन्त्री नरेन्द्र मोदीले अमेरिकी राष्ट्रपति जो बाइडेनलाई १० दान दिएका छन् । अमेरिका भ्रमणमा रहेका मोदीले चन्दनबाट तयार पारिएकोे शानदार बाकसमा २४ क्यारेट सुनबाट बनाइएको सिक्का उपहार दिएका हुन् । यस्तै, प्रधानमन्त्री मोदीले बाइडेनपत्नी एवं प्रथम महिला जिल बाइडेनलाई ७ दशमलव ५ क्यारेटको हरियो हिरा उपहार दिएका छन् । दशदान ८० वर्ष आठ महिनाको उमेर पूरा गरेपछि दिइन्छ ।

मोदीले बाइडेनलाई दिएको दशदानमा उपनिषद्को १० सिद्धान्तको पहिलो संस्करणको प्रतिलिपि समेत रहेको बताइएको छ । बाकसमा श्लोकसहितको ताम्रपत्र पनि थियो । यस्तै बाकसमा चाँदीको दीयो र गणेशको मूर्ति पनि राखिएको थियो । यसबाहेक सेतो तिलको दाना, चन्दनको धुलो, चाँदीको हस्तनिर्मित नरिवल, घ्यू, चामल, सख्खर, चाँदीको सिक्का र नुन पनि राखिएको थियो ।

राष्ट्रपति बाइडेनले प्रधानमन्त्री मोदीलाई २०औँ शताब्दीको सुरुमा हातले बनाइएको प्राचीन अमेरिकी बुक ग्याले दिएको समाचार माध्यमहरूले उल्लेख गरेका छन् । यस्तै प्रथम महिलाले रोबट फ्रस्र्टको संकलित कविताहरूको पहिलो संस्करणको प्रतिलिपी दिएकी थिइन् ।

अमेरिका र चीनबीच बढ्दो विवादका बीच भारतीय प्रधानमन्त्री मोदीको अमेरिका भ्रमणलाई लिएर विश्वभर चासोका रूपमा हेरिएको छ । अमेरिकाले भारतलाई महत्वपूर्ण साझेदारीको रूपमा लिने गर्छ । भारतीय प्रधानमन्त्री मोदीले पनि अमेरिका–चीनको तनावपूर्ण समबन्धको फाइदा उठाउँदै विश्वमञ्चमा आफ्नो प्रभाव बढाउने प्रयास गरेका छन् । मोदी तीन दिनको भ्रमणका लागि मंगलबार अमेरिका पुगेका हुन् ।