केबीएले मनायो विश्व ब्याडमिन्टन दिवस

काठमाडौं । काठमाडौं ब्याडमिन्टन एकेडेमी (केबीए) ले नक्साल स्थित बाल मन्दिरमा विश्व ब्याडमिन्टन दिवस मनाएको छ । अभिभावकविहीन तथा जोखिममा रहेका बालबालिकालाई आश्रय दिइरहेको बाल मन्दिरको नक्सालस्थित आवासमा रहेका ४५ बालिकाले एकेडेमीका खेलाडीहरूसँग ब्याडमिन्टन सिक्ने अवसर पाएका थिए । साथै, यस खेलको प्राविधिक शब्दावलीबारे बालिकालाई जानकारी दिएको छ । कार्यक्रममा ७० भन्दा बढी बालिकाको उपस्थिति रहेको थियो । उनीहरूले खेल्नुको साथ नाचगान गर्दै मनोरञ्जन पनि गरेका थिए ।

कार्यक्रममा एकेडेमीकी अध्यक्ष रिता विष्टले बाल मन्दिरकी अध्यक्ष विद्या उपाध्याय न्यौपानेलाई मायाको चिनो प्रदान गरिन् । काठमाडौं ब्याडमिन्टन एकेडेमीका सचिव दीपक थापाले गत वर्षको विश्व ब्याडमिन्टन दिवस तत्कालीन राष्ट्रपति विद्यादेवी भण्डारीसँग शितल निवासमा मनाएको र यो दिवसलाई यसपालि फरक तरिकाले मनाउन बाल मन्दिर छनोट गरिएको जानकारी दिए । एकेडेमीले विश्व ब्याडमिन्टन दिवसमा प्रयोग गरेका सम्पूर्ण खेल सामग्री बाल मन्दिरलाई हस्तान्तरण गरेको छ ।

बाल मन्दिरका बालिकालाई एकेडेमीका खेलाडीसहित नेपालका नम्बर एक महिला खेलाडी रसिला महर्जनले ब्याडमिन्टनको ¥याकेट समातेर सटललाई प्रहार गर्दै नेट कटाउन सिकाएकी थिइन् । यसै अवसरमा रसिलाले आफूले जितेको पुरस्कारको १० प्रतिशत रकम बालिकाहरूको शिक्षाको लागि बाल मन्दिरलाई प्रदान गर्ने घोषणा गरिन् । उनले हालै अन्नपूर्ण र प्रधानमन्त्री कपको उपाधि जितेकी छिन् ।