विश्वकप छनोट:नेपाल नेदरल्यान्ड्ससँग ७ विकेटले पराजित

काठमाडौं, आइसिसी एकदिवसीय विश्वकप छनोट प्रतियोगिताअन्तर्गत समूह चरणको आफ्नो अन्तिम खेलमा नेपाल नेदरल्यान्ड्ससँग ७ विकेटले पराजित भएको छ । नेपालले जितका लागि दिएको एक सय ६८ रनको लक्ष्य नेदरल्यान्ड्सले ३ विकेट गुमाएर २७.१ ओभरमा पुरा गर्‍यो । नेदरल्यान्ड्सका लागि म्याक्स वो डाउव्ड ९० रन ,विक्रमजीत सिंह ३०,वेस्ली ब्यारेसी ३ रन,बास डे लीडेले नटआउट ४१ रन र तेजा निदामानुरुले नटआउट २ रन प्रहार गदै नेदरल्यान्ड्सलाई जित दिलाउन सफ रहे । नेपालका लागि सन्दीप लामिछाने २ विकेट र गुलशन झाले १ विकेट लिदाँ अरु कुनै पनि वलरले विकेट लिन सकेनन् ।

जिम्बावेको टाकासिँगा स्पोर्टस् क्लबमा टस हारेर पहिले ब्याटिङको निम्तो पाएको नेपालले ४४ दशमलव ३ ओभरमा सबै विकेट गुमाउँदै एक सय ६७ रनको योगफल बनाएको हो ।नेपालका लागि कप्तान रोहित पौडेलले ५५ बलमा तीन चौका र एक छक्काको सहयोगमा सर्वाधिक ३३ रनको योगदान दिए । त्यस्तै नेपालका ओपनर आसिफ शेख तेस्रो ओभरको दोस्रो बलमा शून्य रनमा आउट भए । आजको खेलमा नेपालका कुनै ब्याटरका बीचमा उत्कृष्ट साझेदारी हुन सकेन ।

यसैगरी सन्दीप लामिछानेले ३३ बलमा चार चौकाको सहयोगमा २७ रन बनाए भने अर्का ओपनर कुशल भूर्तेलले ४२ बलमा दुई चौकाको सहयोगमा २७ रन जोडे । भीम सार्कीले ५६ बलमा एक चौकाको सहयोगमा २२ रन बनाए । दीपेन्द्रसिंह ऐरीले १४ र कुशल मल्लले १२ रन बनाए ।

नेदरल्यान्ड्सका लागि लगन भान विकले चार विकेट लिए भने बास डि लिड र विक्रमजित सिंहले समान दुईरदुई विकेट लिए । त्यस्तै क्लेटन प्लोयट र आर्यान दत्तले समान एकरएक विकेट झारे ।

नेपाल पहिलो खेलमा जिम्बावेसँग आठ विकेटले पराजित भएको थियो । दोस्रो खेलमा अमेरिकालाई छ विकेटले हराएको थियो । नेपालले तेस्रो खेलमा वेस्टइन्डिजसँग एक सय एक रनको फराकिलो हार व्येहोर्न पुगेको थियो ।

नेदरल्यान्ड्स जिम्बावेसँग छ विकेटले पराजित भएको थियो । नेदरल्यान्ड्सले अमेरिकालाई पाँच विकेटले पराजित गरेको थियो । नेपाललाई हराउँदा नेदरल्यान्ड्स औपचारिकरुपमा सुपर सिक्समा पुगेको छ भने नेपाल सुपर सिक्सबाट बाहिरिएको छ ।