सुबास बस्नेत
दोलखा, असार ३१
प्रधानमन्त्री रोजगार कार्यक्रमअन्र्तगतको बजेट जिल्लाका स्थानीय तहहरूले सडक सोलिङ गर्नमा खर्च गरेका छन् । गत वर्षको तुलनामा यस वर्ष प्रधानमन्त्री रोजगार कार्यक्रमको बजेट सदुपयोग भएको छ । गत वर्ष कतिपय स्थानीय तहरूले उक्त कार्यक्रमको बजेट झार उखेल्ने, फोहोर टिप्नेलगायतका अनावश्यक काममा खर्च गरेका थिए ।
दोलखाका २ नगरपालिका र ७ गाउँपालिका गरी ९ स्थानीय तहहरूले प्रधानमन्त्री रोजगार कार्यक्रमअन्र्तगत ग्रामीण सडकलाई वर्षभरि सञ्चालनयोग्य बनाउनको लागि सोलिङलाई प्रमुख प्राथमिकतामा राखेका हुन् । उक्त रकमले हालसम्म जिल्लाभरिका करिब १८ किलोमिटर ग्रामीण सडकमा सोलिङ गरिएको छ । प्रधानमन्त्री रोजगार कार्यक्रमअन्तरगत दोलखामा साढे तीन करोड बजेट विनियोजन भएकोमा ६५ प्रतिशतभन्दा बढि रकम सडक सोलिङमा खर्च गरेको पाइएको हो । रोजगार कार्यक्रम सुरु गरिसकेका जिरी र भीमेश्वर नगरपालिका तथा गौरीशंकर, बैत्यश्वर, तामाकोशी र विगु गाउँपालिकाले ग्रामीण सडकमा सोलिङलाई पहिलो प्राथमिकतामा राखेका हुन् ।
गौरीशंकर गाउँपालिकाका रोजगार संयोजक प्रभास जोशीका अनुसार गाउँपालिकाको ६ ओटा वडाअन्र्तगतमा साढे ३ किलोमिटर ग्रामीण सडकको सोलिङ कार्य सम्पन्न भएको छ । वैतेश्वर गाउँपालिकाले पालिका केन्द्र पुग्ने नाम्दु–पाँडुडाँडा–सुलडाँडा सडकको साढे ४ किलोमिटर सडक र वडा तहले वडा जोड्ने सडक सोलिङ गरेको गाउँपालिका सदस्य देवराज खत्रीले जानकारी दिए । खत्रीका अनुसार प्रधानमन्त्री रोजगार कार्यक्रमको लागि आएको चार लाख ५१ हजार रकमले वडा न.३ मिर्गेले एक सय ७० मिटर सडक सोलिङ गरेको छ ।
वैतेश्वर गाउँपालिका ३ मिर्गेमा प्रधानमन्त्री रोजगार कार्यक्रमको लागि ४४ जनाले प्रत्यक्ष रोजगार पाएको वडा नम्बर ३ मिर्गेका सचिव अमृत तामाङले जानकारी दिए । तामाङका अनुसार वडा नम्बर ३ मा चालू आर्थिक वर्षमा परेका वडास्तरीय २३ योजना सबै पूरा भएको छ । त्यसैगरी जिल्लाको तामाकोशी गाउँपालिकाले पनि ग्रामीण सडक सोलिङलाई प्रमुख प्राथमिकतामा राखेको छ । तामाकोशी गाउँपालिकाले गाउँपालिकाभित्रका वडामा दुई किलोमिटर सडक सोलिङ गरेको गाउँपालिकाका रोजगार संयोजक दिपेन्द्र कार्कीले जानकारी दिए ।
त्यसैगरी जिरी नगरपालिकाका प्रमुख प्रशासकीय अधिकृत शिवप्रसाद रिजालले नगरपालिकाले पदमार्गलाई प्राथमिकता दिएको भए पनि वडा नं. ४ मा तीन सय मिटर सोलिङ गरिएको बताए । विगु गाउँपालिकाले ६ ओटा वडामा प्रतिवडा २ सय मिटरको दरले सोलिङ गर्ने योजना बनाएको गाउँपालिकाका रोजगार संयोजक भीम थामीले जानकारी दिए । भीमेश्वर नगरपालिकाले पनि सोलिङलाई प्राथमिकता दिएर काम सुरु गरिसकेको तर सम्पन्न भइनसकेकोले यकिन तथ्यांक आइनसकेको सूचना अधिकारी जगदिश अर्यालले जानकारी दिए । जिल्लाको कालिञ्चोक, मेलुङ र शैलुङले कार्यक्रम सञ्चालन सुरु गरेको जनाएको छ ।
कालिञ्चोक गाउँपालिकाका इन्जिनियर नारायण शिवाकोटीले ग्रामीण सडक र नालालाई प्राथमिकता दिएर प्रधानमन्त्री रोजगार कार्यक्रम सञ्चालन गरेको जानकारी दिए । मेलुङ गाउँपालिकाका प्रवक्ता हिरा थोकरले प्रधानमन्त्री रोजगार कार्यक्रमको लागि ४ ओटा वडा छनौट भएको र सबै वडाका ग्रामीण सडक सोलिङ गरिने बताए । शैलुङ गाउँपालिकाले बागखोर–भैंसे सडकमा सोलिङका लागि बजेट विनियोजन भई काम सुरु हुने चरण रहेको पालिका अध्यक्ष भरत दुलालले जानकारी दिए । प्रधानमन्त्री रोजगार कार्यक्रमका लागि जिल्लाका ९ वटा स्थानीयले आफ्ना बेरोजगार नागरिकलाई समावेश गरेर रोजगार दिइरहेका छन् ।
क्याटेगोरी : नेपाल
ताजा अपडेट
- विवाह पञ्चमीलाई व्यवस्थित बनाउन दुई हजारबढी सुरक्षाकर्मी परिचालन
- प्रधानमन्त्री ओलीसँग राष्ट्रिय फोटो पत्रकार समूहको भेट
- २७ सय ५६ बिन्दुमा उक्लियो शेयर बजार
- रुपन्देहीमा आयल निगमको लुम्बिनी प्रादेशिक भण्डारण गृह बन्ने
- संविधानको मूलभूत विषयमा कसैले चाहेर पनि संशोधन हुँदैन: थापा
- प्रधानमन्त्री ओली मंसिर १७ गते चीन जाने
- तत्काल उद्योगको लाइन नकाट्ने समितिको बैठकको निर्णयमा दुई सञ्चालकको फरक मत
- सर्वोच्चद्वारा सुन व्यवसायमा संघको सिन्डिकेट रोक्न अन्तरिम आदेश
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया