विदेशमा पछिल्लो साता मात्रै करिब १ हजार नेपालीमा कोरोना संक्रमण

काठमाडौं ।
विदेशमा कोरोना भाइरसको संक्रमण हुने नेपालीहरुको संख्यामा वृद्धि हुँदै गएको छ । पछिल्लो सातामा मात्रै विदेशमा रहेका करिब एक हजार जना नेपालीमा कोरोना संक्रमण देखिएको हो । गैरआवासीय नेपाली संघका अनुसार यो साता विदेशमा रहेका थप नौ सय ६३ जना नेपालीहरुलाई कोरोना संक्रमण देखिएको हो । संक्रमितमध्ये चार सय ५० जना रोमानियामा रहेका नेपालीहरु छन् ।

गैरआवासीय नेपाली संघको स्वास्थ्य समितिका संयोजक डा. सञ्जीव सापकोटाका अनुसार यो साता रोमानिया, पोल्याण्ड, स्पेन, कतार, भारत, क्यानडा र युकेका रहेका नेपाली कोरोना भाइरसबाट संक्रमण भएका हुन् । गैरआवासीय नेपाली संघका अनुसार यो साता विदेशमा कुनै पनि नेपालीले कोरोना भाइरसका कारण ज्यान गुमाउनु भने परेन ।

विदेशमा ४२ देशमा रहेका नेपालीमध्ये ४३ हजार पाँच सय ६९ जना नेपाली कोरोना भाइरसको संक्रमणमा परेका छन् । तीमध्ये ३९ हजार पाँच सय ६५ जना अर्थात् ९२ प्रतिशत नेपाली कोरोनामुक्त भएको स्वास्थ्य समितिले जनाएको छ । गत सातासम्म १९ देशका दुई सय ८४ जना नेपालीको कोरोना संक्रमणबाट निधन भइसकेको गैरआवासीय नेपाली संघले जनाएको छ ।

यसैगरी गैरआवासीय नेपाली संघ, नेपाल सरकार र विदेशस्थित नेपाली कूटनीतिक नियोगहरुको संयुक्त पहलमा हालसम्म ३३ देशका एक लाख २६ हजार नौ सय ८९ जना नेपालीहरुको उद्धार गरिएको छ ।