भीमदत्तद्वारा निःशुल्क रगत उपलब्ध गराउन रेडक्रसलाई सहयोग हस्तान्तरण

कञ्चनपुर ।
कञ्चनपुरको भीमदत्त नगरपालिकाले नेपाल रेडक्रस सोसाइटीद्वारा सञ्चालित निःशुल्क रक्त सञ्चार सेवा अभियानका लागि सहयोगस्वरूप तीन लाख रूपैयाँको चेक नेपाल रेडक्रस सोसाइटीलाई हस्तान्तरण गरेको छ । नेपाल रेडक्रस सोसाइटीद्वारा सञ्चालित रक्त सञ्चार सेवा केन्द्र महेन्द्रनगरले कञ्चनपुरमा निःशुल्करूपमा रगत उपलब्ध गराउँदै आएको छ । यस अभियानलाई सहयोग गर्न भीमदत्त नगरपालिकाले यस वर्षको बजेटमार्फत चालू आर्थिक वर्षका लागि तीन लाख रूपैयाँ सहयोग हस्तान्तरण गरेको हो ।

निःशुल्क रक्त सञ्चारका लागि भीमदत्त नगरपालिकाले विगत ३ वर्षदेखि निरन्तर सहयोग गर्दै आएको नेपाल रेडक्रस सोसाइटी कञ्चनपुर शाखाका सभापति टेकराज उप्रेतीले जानकारी दिए । उनका अनुसार उक्त रकम बुधबार नगरप्रमुख सुरेन्द्र विष्टले हस्तान्तरण गरेका हुन् । उक्त रकम रक्त सञ्चार सेवा केन्द्रमा रगत परीक्षणलगायतका विभिन्न रक्तदानसम्बन्धी क्रियाकलापमा खर्च गरिने उप्रेतीले बताए । रक्त सञ्चार सेवाले विगत ३ वर्षदेखि कञ्चनपुरमा निःशुल्करूपमा रगत उपलब्ध गराउँदै आएको छ ।

यसका लागि जिल्लाभरका सबै स्थानीय तहहरूले पनि सहयोग गर्दै आइरेहेका सभापति उप्रेतीले बताए । उक्त सहयोगलाई रेडक्रसले सबै स्थानीय तहहरूबाट निरन्तर पाउन सकेमा जिल्लाभरमै निरन्तररूपमा निःशुल्क रगत उपलब्ध गराउन सकिने उप्रतीले बताए । चेक हस्तान्तरण गर्दै नगरप्रमुख सुरेन्द्र विष्टले रेडक्रससँग सधैँ हातेमालो गरेर समन्वय र सहकार्य गर्न भीमदत्त नगरपालिका तत्पर रहेको बताए । नगरपालिकामा रगतको अभाव परेर कोही पनि मर्न नपरोस् भन्ने मनसायले नगरपालिकाले सहयोग गरेको उनले बताए ।