बोर्डद्वारा ४६ संस्थालाई योग्य संस्थागत लगानीकर्ताको स्वीकृति

काठमाडौं ।
४६ वटा संस्थाहरुले योग्य संस्थागत लगानीकर्ताहरुको रुपमा काम गर्न अनुमति पाएका छन् । नेपाल धितोपत्र बोर्डले संस्थागत लगानीकर्ताको रुपमा स्वीकृति लिन निवेदन पेश गर्न सूचना आह्वान गरेअनुरुप ६२ संस्थाहरुले निवेदन पेश गरेकोमा ४६ वटा संस्थाहरुलाई योग्य संस्थागत लगानीकर्ताको रुपमा काम गर्न अनुमति दिइएको बोर्डका प्रवक्ता निरज गिरीले जानकारी दिए ।

प्रवक्ता गिरीका अनुसार धितोपत्रको मूल्य निर्धारण पारदर्शी तथा प्रतिस्पर्धात्मकरुपमा गरी वास्तविक क्षेत्रका कम्पनीको बजार प्रवेश प्रोत्साहित गर्न अन्तर्राष्ट्रियरुपमा प्रचलनमा रहेको बुक बिल्डिङ विधि प्रारम्भिक सार्वजनिक निष्काशनमा लागू गर्न बोर्डले बुक बिल्डिङ निर्देशिका, २०७७ जारी गरिसकेको र वास्तविक क्षेत्रका केही कम्पनीहरुले यस विधिमार्फत धितोपत्रको सार्वजनिक निष्काशन गर्न तयारी समेत गरिरहेका छन् ।

सोही आधारमा बोर्डले इच्छुक संस्थाहरुलाई योग्य संस्थागत लगानीकर्ताको रुपमा स्वीकृति लिन निवेदन पेश गर्न सूचना आह्वान गरेको थियो । आह्वानपछि ६२ संस्थाहरुले निवेदन पेश गरेकामा ४६ वटालाई स्वीकृति दिइएको प्रवक्ता गिरीले बताए । उनले भने, ‘निवेदक संस्थाको वित्तीय तथा व्यवस्थापन पक्षको अध्ययन गरी निर्देशिकाबमोजिमको कागजात तथा विवरण पेश गरेका ४६ संगठित संस्थालाई योग्य संस्थागत लगानीकर्ताकोरुपमा कार्य गर्न बोर्डले स्वीकृति प्रदान गरेको हो ।’

बोर्डबाट स्वीकृतिप्राप्त योग्य संस्थागत लगानीकर्ताले निष्काशनकर्ता कम्पनीको प्राविधिक, वित्तीय, व्यवस्थापन, भावी योजना तथा रणनीति लगायतका विवरणको अध्ययनको आधारमा सुसूचित तवरले धितोपत्रको आशय मूल्य पेश गरी प्रारम्भिक सार्वजनिक निष्काशनको मूल्य निर्धारणमा दक्ष तथा व्यावसायिक सहभागितामार्फत धितोपत्रको उचित मूल्य निर्धारण गर्न सहयोग पुग्ने विश्वास बोर्डले लिएको छ । यसबाट वास्तविक क्षेत्रका संगठित संस्थाको थप प्रवेश हुने अपेक्षा गरेको जानकारी पनि बोर्डका प्रवक्ता गिरीले बताए ।