‘उज्यालो भविष्य’को वार्षिकोत्सव

काठमाडौं । उज्यालो भविष्य संस्थाले आफ्नो स्थापनाको १० औँ वार्षिकोत्सव मनाएको छ । संस्थाले राजधानीमा शनिबार सामाजिक क्षेत्रमा काम गर्ने विभिन्न व्यक्तिलाई सम्मान गर्दै वार्षिकोत्सव मनाएको हो ।

संस्थाले बेवारिसे लास व्यवस्थापन गर्दै आएकी सपना रोक्का मगर, विभिन्न विद्यालयमा पढ्ने गरिब जेहेन्दार विद्यार्थीलाई पढ्न छात्रवृत्ति उपलब्ध गराउँदै आएकी समाजसेवी शारदा उप्रेती, पूर्वएआईजी धिरु बस्न्यात, लक्ष्मण गुमाजु, शान्ति श्रेष्ठलगायतलाई सम्मान गरेको छ । उनीहरूलाई कार्यक्रममा प्रमुख अतिथि कानुन, न्याय तथा संसदीय मामिलामन्त्री धनराज गुरुङले दोसल्ला ओढाई सम्मानपत्र प्रदान गरेका थिए ।

कार्यक्रममा मन्त्री गुरुङले समाजसेवा निःस्वार्थ भावनाबाट हुनुपर्ने बताए । समाजसेवाको नाममा चन्दा असुली गर्ने प्रवृत्ति बढेको उल्लेख गर्दै उनले यसलाई न्युनीकरण गर्न सबैले जोड दिनुपर्ने बताए । संस्थाका अध्यक्ष राजन बस्नेतले सडक मानव व्यवस्थापनमा आफूहरूको सहयोग रहँदै आएको बताए । उनले महिला तथा बालबालिकाको क्षेत्रमा संस्थाले काम गर्दै आएको बताए । कार्यक्रममा नेपाली कांग्रेसका केन्द्रीय सदस्य अजयबाबु शिवाकोटी, नेपाली कांग्रेस दोलखाका पार्टी सभापति वर्मा लामा, भीमेश्वर नगरपालिकाका मेयर ईश्वरनारायण मानन्धरलगायतले आफ्नो धारणा राखेका थिए ।