एनआरएनए अस्ट्रेलियाको अध्यक्षमा पोखरेल

काठमाडौं । गैरआवासीय नेपाली संघ अस्ट्रेलियाको अध्यक्षमा अनिल पोखरेल निर्वाचित भएका छन् । अन्य दुई प्रत्यासी डिला खरेल र देवबहादुर गुरुङलाई पराजित गर्दै पोखरेल निर्वाचित भएका हुन् ।

संघको मुख्य पदमा पोखरेलकै टिम निर्वाचित भएको छ । संघको महासचिवमा सन्तोष कुँवर र सचिवमा थिरबहादुर गुरुङ निर्वाचित भएका छन् । यस्तै, संघको एनएसडब्लु एससीसी स्टेट कोअर्डिनेटरमा विनोद कुँवर निर्वाचित भएका छन् । महासचिव र सचिव दुवै पोखरेल प्यानलबाटै निर्वाचित भएका हुन् । संघको कोषाध्यक्षमा अर्जुन गौतम र सहकोषाध्यक्षमा रोजी पन्त निर्वाचित भएका हुन् । उनीहरू पनि पोखरेलकै प्यानलबाट चुनावमा उठेका थिए । एक दशकदेखि एनआरएनएमा आबद्ध भएका पोख्रेलले पछिल्लो दुई कार्यकाल कोषाध्यक्षको जिम्मेवारी सम्हालेका थिए । संस्थाको पारदर्शिता र यसको आर्थिक समायोजनलाई प्रभावकारी ढंगले निभाएको कारण दोस्रो कार्यकालमा आफू निर्वाचित भएको पोख्रेलले बताउँदै आएका छन् । एनआरएन अस्ट्रेलियाको पारदर्शिताका लागि उनकै कार्यकालदेखि त्रैमासिक लेखा विवरण सार्वजनिक हुन थालेको थियो ।