पहिरोमा परी दुई जनाको मृत्यु, दुई बेपत्ता

दोलखा । जिल्लाको उत्तरी क्षेत्र गौरीशंकर गाउँपालिका वडा नम्बर ७ मार्बु टोपटारमा पहिरोमा परी दुई जनाको ज्यान गएको छ । गत बिहीबार राति गएको पहिरामा परी बेपत्ता भएका चार जनामध्ये दुई जनाको शव शुक्रबार दिउँसो फेला परेको हो । दुई जना अझै बेपत्ता रहेका छन् ।

रातको समय अविरल बर्षासँगै बस्तीमाथिको सल्लेभिरबाट खसेको पहिरोमा परी टोपाटार गाउँका कृष्णबहादुर मगर, उनकी श्रीमती देवीमाया मगर, हरिलाल श्रेष्ठ र तीन वर्षका बालक प्रिन्स थामी बेपत्ता भएका थिए । बेपत्ता भएकामध्ये शुक्रबार देवीमाया र प्रिन्सको शव भेटिएको जिल्ला प्रहरी कार्यालय दोलखाका प्रहरी नायव उपरीक्षक दिपक खड्काले बताए । उनका अनुसार पहिरोमा बेपत्ता अन्य दुई जना हरिलाल श्रेष्ठ र कृष्णबहादुर मगरको खोजी कार्य जारी रहेको छ । शुक्रबार र शनिबार दिनभर खोज्दा पनि उनीहरू फेला पार्न नसकिएको उनले बताए । उनीहरूको खोजी कार्यमा शुक्रवार बिहानदेखि नै नेपाली सेना, जनपथ प्रहरी, सशस्त्र प्रहरीको टोली लागिरहेको प्रहरीले जनाएको छ ।

पहिरोमा परेर सोही टोलका यज्ञबहादुर थामी, उनकी श्रीमती धनमाया थामी र बुहारी सीता थामी घाइते भएका छन् । उनीहरूको काठमाडौंमा उपचार भइरहेको वडा नम्बर ७ का वडाध्यक्ष सोनाम शेर्पाले जानकारी दिए । घाइतेहरूको हेलिकोप्टरमार्फत शुक्रबार घटनास्थलबाट उद्धार गरी काठमाडौं पठाइएको हो । पहिरोले स्थानीय कृष्णबहादुर मगरको घर पूरै बगाएको छ । यस्तै, हरिलाल श्रेष्ठ, यज्ञ थामी, टपेन्द्र गुरुङ र घनश्याम खत्रीको घरमा समेत पूर्णरूपमा क्षति पुगेको छ । पहिरोका कारण दर्जनौँ परिवार विस्थापित बनेका छन् ।

सोही वडामा रहेको सल्लेको ठाडोखोलामा बाढी आएर पहिरो गएको वडाध्यक्ष शेर्पाले बताए । पहिरोले सयौँ रोपनी खेतीयोग्य जमिन पुरेको स्थानीय निमाल्मु शेर्पाले बताइन् । पहिरोको कारण खेती लगाइएको जमिनमा ढुङ्गामुढा र लेदोले भरिएको छ । दोलखाको उत्तरी क्षेत्रमा बर्सेनि पहिरो जाने गरेको छ । मार्बुमा चार वर्षअघि पनि पहिरोले ठूलो जनधनको क्षति भएको थियो ।